ORMOC CITY- Gibaylo ang tanang mga pulis sa Police Station 2 (PS2) ug Police Station 3 (PS3) kagahapong adlawa.
Base sa inisyal nga impormasyon nga nakuha sa Sun.Star Superbalita may kalabutan sa nahitabong sunodsunod nga pagpamusil sa dakbayan niadtong milabayng semana ang rason sa pagbaylo.
Ang Police Station 1 (PS1) lang ang bugtong estasyon nga wa matandog sa ‘revamp’.
Si P/SInsp. Maturino Diaz ang hepe sa PS2 samtang si P/SInsp. Tyronne Mark Cartalla sa PS3.
Mao kini ikaduhang higayon nga na hepe sa PS2 si Diaz samtang mao kini ang labing unang higayon nga nahimong hepe sa usa ka estasyon si Cartalla.
Matod ni Cartalla nga dako kaayong hagit kaniya ang pagkupot sa PS3 tungod kay sakop niini ang kontrobersiyal nga Barangay Tambulilid nga gitawag og ‘shabu tiange’.
“Kon unsay ako makaya maoy ako buhaton, seguro di man mapugngan pero at least ma-minimize pero ako paningkamutan nga ma-prevent gyod,” matod ni Cartalla.
Girelibohan na usab isip hepe sa Traffic Management Section (TMS) si P/Supt. Ibrahim Jambiran ug gibalhin kini sa Police Community Relations (PCR) branch sa Ormoc City Police Office (OCPO).
Duha usab ka opisyal ang gilabay sa laing lugar gikan sa Ormoc mao sila si P/Supt. Alfred Tadefa nga toa na sa Tacloban ug P/Supt. Virgilio Bayun-on nga toa na sa Samar.