WANTED naka-ipsot, apan nasikop ang iyang bata-bata nga nakuhaag armas, granada atol sa ronda sa kapulisan niadtong Lunes sa alas 6:00 sa gabii didto sa Sitio Tubod, Barangay Valencia, dakbayan sa Carcar.

Si Vincent “Bimboy” Saducas, hingkod ang panuigon, taga Barangay Liburon, Carcar, naka-ipsot, pero napusasan ang iyang bata-bata nga si Neil Baring Alison, 24, ulitawo taga Barangay Poblacion 1, Carcar.

Si SPO3 Jorame Tanudtanud, imbestigador sa Carcar Police Station, nga nahinabi sa Sun.Star Superbalita nagkanayon nga si Saducas dugay na nga wanted sa ilang lugar ug daghang mga standing warrant of arrest sa kasong murder, frustrated homicide.

Sumala pa nga nakadawat sila’g impormasyon nga nakit-an si Saducas sa maong dapit uban sa mga kauban niini hinungdan nga wa sila maglangay pagsuhid niini.

Ang kapulisan nagdala sa warrant of arrest ni Saducas, nga murder nga gi-syu ni Wilfredo Fiel Navarro, sa Regional Trial Court (RTC-7) Branch 19, dakbayan sa Carcar.

Apan sa pag-abot sa ilang tropa nakabantay ang pundok ni Saducas hinungdan nga nagkatibuwagsa sa pagpanagan. Si Saducas kalit nga nahanaw sa ngitngit nga dapit.

Si Alison, wa na makalihok og makasukol sa kapulisan, nakuhaan sa iyang possession sa usa ka .22 caliber, nga may limma ka buhing bala, sling bag diin didto ang apple grenade.

Matud pa ni SPO3 Tanudtanud, nga si Saducas, usa sa mga bangiitang criminal sa Carcar.

Apan gumikan sa ka idlas niini kanunay nga makasibat sa mga operasyon sa kapulisan.