Migallen: Adjustment sa Warriors
KARONG buntag, mahipunting na usab ang mata sa mga nagsunod sa NBA sa Game 3 sa 2015 NBA Finals tali sa Cleveland Cavaliers ug Golden State Warriors.
Ambot og mahulagway ba kadto nga tsamba, pero ang kadaugan sa Cavaliers sa Game Two nga maoy nakapatabla sa best-of-seven series posibling naghatag og dakong kahulogan sa Cleveland. Sa wa pa magsugod ang finals, inilog ang Golden State batok sa Cavaliers tungod sa daghang rason.
Una niini mao nga nagpabilin nga healthy ang maong team kon itandi sa Cavaliers kinsa, sa kalit lang, nawad-an sa serbisyo ni Kevin Love.
Nisamot ug kabiya ang Cleveland sa dihang sa Game One napiang ug di na usab makaduwa ang lain nilang pambato nga si Kyrie Irving.
Mao nga sa Game Two, ang mga sugarol mitalidhay og pusta sa Cavaliers pero kadtong mga diehard nga mga fans ni LeBron James padayon nga nagsuporta ug nag-ampo.
Apan bisan pa man diha sa tugkaran sa Warriors gipakita ni James ug kaubanan nga ang pagkawagtang ni Love ug ni Irving wa makaapekto sa ilang moral. Sa pagkawagtang ni Irving, ang batan-on nga si Matthew Dellavedova mao karon ang masentro sa atraksyon.
Sa Game 2 siya ang gitumbok nga responsabli kon nganong napugdol ang opensa ni Stephen Curry. Sa kasaysayan, kon ang finals nagtabla, 1-1, 31 niini sa 37 ka finals nga midaog sa Game Three maoy nakampyon.
Pero sa sitwasyon ni James lahi. Niadtong 2013 finals, ang Miami Heat napildi sa Game 3 batok sa Spurs pero sila ang midaog sa series. Apan sa tuig 2011, ang Heat naglabaw, 2-1, sa finals apan gipildi sila sa Dallas Mavericks. Sa laktod nga pagkasulti, unpredictable ang nagpadayon nga series.
Kon statistics atong basehan, nawala na man tuod sa Warriors ang homecourt advantage tungod sa ilang kapildihan sa Game Two, apan base sa record ilang napamatuod nga mas daghan sila og daog itandi sa pildi kon sila ang manulong.
Sa regular season sila nakaposte og franchise record nga 28 road victories ug aduna usab silay 5-2 nga baraha sa playoffs.
On the record, ang Cleveland midaog og ka 26 ka higayon sa katapusang 28 ka duwa niini diha sa ilang korte.
Laing hinuklugan usab og maayo sa Warriors mao ang presensiya ni Timofey Mozgov, sentro sa Cavs, sa ilawom nga bahin kinsa nag-average og 16.5 points ug 9.0 rebounds sa duha ka duwa sa finals ug gilupig niini si Andrew Bogut. Naobserbahan usab nga minus kaayo ang rotation sa bola sa Warriors sa Game Two diin aduna lang silay 16 ka assist kon itandi sa Game One nga naka-24 sila.
Si Warriors coach Steve Kerr sayod nga mas epektibo ang Warriors kon gamitan niya og mga gagmayng lineup alang sa iyang running game sama sa Game One, apan naka-adjust na niini ang Cavaliers sa Game Two.
Mosuway kaha pagsugal si Kerr nga mogamit sa iyang mga bigmen ug mag slow break? Kini maoy mas kuyaw kay maghatag kini og bintaha sa Cleveland. (junmigs0622@yahoo.com)