ANG giingon nga naagrabiyado nga Pinoy nga boksidor nga si Ian Clark Bautista naglaom og makiangayon nga paghurado karon nga nasulod siya sa Southeast Asian (SEA) Games flyweight finals batok sa home favorite si Hanurdeen Hamid sa Singapore.

Si Bautista kinsa nakasinati usab og kontrobersiyal nga pagkapildi batok kang South Korea’s Choe Sang-Don niadtong miaging tuig sa Asian Games sa Incheon nagmalaumon nga dili na kini mahitabo karon.

Giangkon ni Bautista nga dili sayon ang makig-away og kontra nga gikan sa host nga nasod ug nag-ampo siya nga makiangayon ang desisyon sa mga hurado.

Matod ni Bautista nga aduna siya’y kulba kabahin sa iyang tahas sa final apan gipasalig niyang buhaton niya ang tanan niyang makaya aron makalabni og gold medal.

Wala mahatagi si Bautista og kahigayunan nga makatungtong sa Asiad quarter-finals human sa iyang kontrobersiyal nga pagka­pildi kang Choe sa South Korea.

Ning higayuna, gipaneguro ni Bautista nga makaabot siya sa finals sa SEA Games pinaagi sa pag-knockout kang Thongbang Seuaphom sa Laos sa semi-finals.

Gipildi usab ni Bautista ang 2013 SEA Games gold medallist nga si Chatchai Butdee sa Thailand sa quarter-finals.

Karong adlawa gikatakda ang panagharong nila ni Bautista ug Hamid sa finals.