MATAG buntag kon buksan nato atong radyo ug ibutang sa dayal sa DXCC RMN, una gayud nga madungog ang maanindot ug tsada paminawon nga tingog ni Kasamang Analiza Reyes.
Daghan ang galantaw nga unta masusama kaniya ug mapaminaw sa radyo apan dili tanan ang gakahatagan og higayon.
Susama sa kapatsada sa iyang tingog diha sa radyo dili sab ingon ana kapatsada ang iyang mga nasinatian sa kinabuhi labina sa iyang pagpanarbaho ug ang SunStar SuperBalita nahatagan og tsansa nga mahibaloan kung kinsa si kasamang Analiza luyo diha sa radyo isip anchor.
“Nagsugod ko og trabaho isip radio anchor/reporter niadtong May 2003 sa maong panahon volunteer ra gyud ko sa DXCC-RMN Cagayan de Oro kay dili man uso kaniadto ang hiring sa reporter/anchor kay kasagara mga volunteer ra,” pagsaysay niini.
Bisan pa sa iyang status sa kompanya, gihatagan gihapon kini og dagkong assignments sa management susama sa pag report sa duty sa alas dos pa sa kadlawon labina kay alas tres man gasugod og ere ang DXCC.
“Daghang panahon nga ako ang ga anchor sa newsbreak gikan buntag paingon hapon o gabie, gabasa og public service announcements, ga tandem na ko og balita sa alas siete kang Konsehal Zaldy Ocon sa dihang naa pa siya sa dxCC, galabay na ko og balita sa RMN Manila bisan volunteer pa ko,” matud niini.
Miabot pa sa upat ka tuig siya nga nagsakripisyo usa nahimong regular employee sa DXCC-RMN.
“Bisan sa akong status, nagpabilin gihapon ko tungod sa akong gugma sa broadcasting kay nigradwar man ko sa kursong BA (Bachelor of Arts in) Broadcast Communication sa University of the Philippines in the Visayas isip scholar ug sa tumong nga mahimo gyung announcer sa radyo or telebisyon,” butyag niini.
Tuig 2007 daw grasya alang kaniya dihang nahimong Station Manager sa DXCC-RMN Cagayan de Oro si Engineer Charley Canoy nga mao usab ang kanhi vice president sa AM Operations sa RMN.
Daw sa maong higayon nasusihan ang iyang status sa estasyon.
“Dili nako malimtan ang pangutana, Volunteer ra ka pero gisaligan na ka paghatag report sa Manila? Pahiyom lang ang akong natubag. Maong mapasalamaton kaayo ko ni Sir Charley nga iyang nakita ang akong mga sakripisyo sa dxCC-RMN. Two years after nahatagan ko og kahigayonan nga mahimong News Manager ug Program Director sa DXCC,” butyag niini.
Balanse sa oras
Isip usa ka inahan nga nangempleyo sa kompanya gibutyag niini nga dili sayon nga ibalanse ang oras sa pamilya ug trabaho.
“Daghan mga panahon nga kadlawon pa biyaan na nako ang akong mga anak ug bana kay lagi motrabaho na ug mouli aron makaatiman na sab sa mga bata sa ilang mga assignments, motambong og meeting sa eskwelahan kay gahawid pud ko og tag-as nga posisyon sa PTA (Parent-Teacher Association), manghinlo sa balay kay walay gisweldohang katabang ug uban pa nga dapat himoon isip inahan sa tulo ka mga anak (Grade VI, Grade I ug 4 years old) ug isip usa ka asawa.”
Dugang niini, aduna gayud mga panahon nga moabsent sa trabaho labina gayud kon usa sa iyang mga anak ang masakit.
“Gawas sa akong mga anak ug bana, ako usab ang usa sa gisaligan sa napulo namo ka igsoon pag-atiman sa tambal ug check up sa akong Mama ug Papa maong time management gyud ang gikinahanglan.”
“Bisan tan-aw nako nga usa ka oras ra ko makauli sa balay kay mobalik na sab sa station, mouli gyud ko para maatiman sab ang pamilya kay para sa ako dili man gud ta mahimong productive sa atong trabahoan if napasagdan nato ang atong pamilya.”
Gibutyag usab niini nga pait alang kaniya kon taas-taas ang coverage tungod kay kini nga mga higayon halos maglisod siya sa pag-uli sa ilang balay.
“Dunay mga coverages nga gikan pako sa kadlawon hangtud sa gabie naa pa sa estasyon. Dunay mga panahon nga ubanon nako akong bana ug biyaan tungang gabie akong mga anak nga sila ra sa balay kay naay sunog, baha ug uban pang dagkong insidente nga kinahanglan i-ere dayon. Ingon ana nga mga sakripisyo ang naagian ug padayon pang maagian,” matud niini.
Inpirasyon usab alang kaniya ang iyang mga tigpaminaw nga gapaabot og mensahe nga gadayeg sa iyang tingog.
“Mapasalamaton kaayo ko sa grasya nga gihatag sa Ginoo sa ako, ang akong tingog ug kahibalo. Kay kung tingog ra walay kahibalo dili gihapon ka magdugay sa broadcasting. Daghan ang ga text or ga message sa Facebook nga lagi gapaminaw sila sa akong mga programa kay nindot ko og tingog. Ako lang silang ginatubag og salamat, Salamat sa inspirasyon.”
“Ang mga listeners man gud ang akong gihimong inspirasyon sa matag adlaw nakong paningkamot diha sa trabaho.”
Kalipay usab niya nga tungod sa iyang trabaho aduna mga tawo nga gapaminaw nga molantaw kaniya.
“Maingon nako nga diay bisan sa simpleng pamaagi sa akong pagka anchor/reporter sa DXCC naa diay koy natandog nga mga tawo aron maningkamot nga makahuman sa ilang pagtoon ug nga gusto nilang mahimo usab nga broadcaster sama nako inig mahuman na sila sa ilang pagtoon.”
Gani ikasubo niya nga usahay kung wala siya makatingog sa radyo kay adunay importanteng gilakaw aduna dayon magpaabot og mensahe nganong wala siya sa ere.
Madungog si Kasamang Analisa sa dxCC Express 4:30 ngadto 6 sa gabii ug substitute anchor sa ubang programa sama sa Unang Radyo, Unang Balita sa alas 4 paingon sa alas 6 sa bunta ingon man Straight to the Point sa alas 6 sa buntag paingon sa alas 9 sa buntag.
Aduna usab kini kaugalingon nga depinisyon sa women empowerment.
“Paghatag kahigayonan sa mga kababaihan nga mapakita ang ilang mga skills, talents and knowledge diha sa pamilya, komunidad ug kompanya,” butyag niini.
Dugang niini nga taliwala usa siya ka babae dakong kalipay niya nga mahimong usa ka Program Director ug News Manager sa DXCC-RMN.
“Ako kining gidawat ang duha ka tag-as nga posisyon nga walay pagduha-duha tungod kay nakita nako nga sa akong mga sakripisyo nga gihatag sa estasyon, naghatag usab kini og kalig-on kanako sa paghimo sa akong mga tahas sa kompanyam,” butyag niini.
Gibutyag usab niini nga tungod usab sa iyang pagpanarbaho natubag ang mga panginahanglan sa iyang pamilya.
“Nahatag nako ang mga panginahanglan sa akong pamilya sama sa pagkaon, pagpa-eskwela sa akong mga anak ug uban pa. Tungod sa akong trabaho, wala na kaayo ko mabalaka nga wala na mobalik sa abroad akong bana nga kanhi seaman kay willing man pud siya nga mopuyo nga simple lang kay ako lang man ang dunay permanenteng trabaho bisan gamay lang ang sweldo,” butyag niini.
“Gawas sa challenge sa trabaho, ako usab nga gidawat ang mga tag-as nga posisyon sa PTA sa Bulua Central School, gani natagaan nako og pasidungog isip outstanding parent. Pinaagi sa maong kahimtang, masulti nakong kaya na karon sa mga babaye ang magtrabaho, mag-atiman sa mga panginahanglan sa pamilya ug mahimong aktibo sa komunidad!” panapos nga butyag niini.