WALAY swerte ang Kagay-anong si Francis Casey Alcantara human matagak sa unang round sa Bahrain F2 Men’s Futures singles tournament niadtong Martes, Marso 28.
Kini human giparot ang 25-anyos nga Alcantara batok kang fourth seed nga si Filip Horansky sa Slovakia sulod sa duha ka sets.
Nibira sa unang dugo ang Slovakian sa unang set agi sa iskor nga 6-3, sundan dayon og demolisyon sa ikaduha sa iskor 6-2.
Didto na mototok si Alcantara sa doubles event sa iyang panag-uban ni Benjamin Lock sa Zimbabwe.
Nidaug sila Alcantara ug Lock sa ilang unang round nga dula agi sa 6-3 ug 6-2 nga daug batok Mousa Shanan Zayed ug Mubarak Shannan Zayid sa Qatar.
Maatbang sa Kagay-anon ug Zimbabwean ang Amerikanong sila Anderson Reed ug Mat Seeberger sa quarterfinals niadtong Miyerkules.