GILUPIG ni Chezka Centeno ang bangiitang si Rubilen Amit, 7-5, sa All-Filipina final sa women’s 9-ball pool singles sa Southeast Asian Games kagahapon sa Singapore.
Sa wala pa niya gikaharong ang kababayang si Amit sa finals, si Centeno sunodsunod nga milupig nila ni Thi Ngoc Le Doan sa Vietnam, Hui Ming Jessica Tan sa Indoneia ug Siraphat Chitchomnart sa Thailand.
Sa iyang bahin, ang lumad nga taga Mandaue City nga si Amit nakasulod sa finals pinaagi sa pagbuntog nila ni Fathrah Masum sa Indonesia ug Aye Mi Aung sa Myanmar.
Si Centeno maoy ikaduhang gold medalist sa Pilipinas gikan sa duwang billiards/snooker.
Ang unang nakahatag sa gold medal sa Pilipinas gikan ning maong sporting event mao ang panagpares nila ni Warren Kiamco ug Carlo Biado, nga mao ang naghari sa men’s 9-pool doubles niadtong Dominggo.
Si Kiamco lumad nga taga Pasil, Cebu samtang si Biado maoy nikampiyon sa Sun.Star Superbalita 9-Ball Challenge niadtong 2012.
Ang gold medal ni Centeno maoy ikasiyam nga nahipos sa Pilipinas gikan sa matag duha ka mga tuig nga kompetisyon.
Ning pagsuwat, niamot na sa 10 ka gold medals ang naangkon sa Pilipinas numan nipatigbabaw si gymnast Reyland Capellan sa men’s floor exercise kagahapon.