HUMAN natabla ni LeBron James ang 2015 National Basketball Association (NBA) Finals pinaagi sa laing impresibo niyang duwa sa Game 2, namaol og maayo ang iyang mga tiil.
Nagkinahanglan siya og ice treatment ug saktong pahuway. Wala siya mag-inusara.
Human sa duha ka sunodsunod nga overtime nga mga duwa sa Oracle Arena, ang mga magduduwa apil na ang mga referee pulos nangaluya ug aduna lang sila’y usa ka adlaw nga pahuway.
Karong buntag, ang Golden State Warriors moasdang sa Quicken Loans Arena aron harungon pagbalik ang Cavaliers sa Game 3 sa NBA Finals.
Sa 100-108 nga kapildihan sa Cavaliers sa Game 1, si James mitali og 44 puntos sulod sa 46 ka mga minutos nga pagduwa.
Sa 95-93 nga kadaugan sa Cavaliers sa Game 2, si James miposte og triple double 39 puntos, 16 rebounds ug 11 ka assists sulod sa 50 ka mga minutos nga pagduwa.
Dili malilong nga si James maoy labing hago sa tanang mga magduduwa. Apan nagtuo ang four-time MVP nga aduna pa siya’y dugang ikabuga alang sa pagpadayon sa best-of-seven series.
“It’s a maximum of five games left in the NBA season. So I’m ready for whatever,” matod ni James.
Human naangol si Kyrie Irving (tuhod) ug dili na makabalik og duwa, grabe na ka inilog ang Warriors.
Apan sa pagpangulo ni James, gipakita sa Cavaliers nga sayop ang maong pagtuo.
Gawas kang James, angayan sab nga daygon ang nihulip sa luna ni Irving nga si Matthew Dellavedova, kinsa maayong nakadepensa sa labing pambato sa Warriors nga mao ang kasamtangang MVP nga si Stephen Curry.
Gumikan sa depensa ni Dellavedova, si Curry igo lang mitali og 5-of-23 shooting ug 2-of-15 sa three-point area, labing ngil-ad niyang duwa sa tibuok season.
Si James kanunay mopahinumdom sa iyang mga kauban nga mao na kini ang ilang higayon nga makalangkat og mayorihiyang titulo sa paugnat sa kusog sa labing unang higayon.
“We have a chance to be a part of history,” batbat ni James.
Ang coach sa Cavaliers nga si David Blatt nahutdan na’g bilib kang James.
“You’d be hard pressed to find a guy anywhere, anytime, I can think of a name or two, but that’s the whole history of basketball, that can give you the kind of all-around performance and all-around leadership that LeBron does for his group,” matod ni Blatt.
“He really willed his guys to win that game. That’s what a champion does.”
Dili ikalimod nga nakahatag og inspirasyon si James sa iyang mga kauban aron mas mokayod pa’g maayo hilabi na kay wala sila si Irving ug Kevin Love nga makatabang kanila.
Si Warriors coach Steve Kerr malaumon nga makabawi ra si Curry gikan grabe ka ngil-ad niining duwa sa Game 2.
“It happens to everybody, whether you’re the MVP or a role player,” pasabot ni Kerr. “Sometimes the shots don’t go in. Sometimes things don’t go your way. Steph will bounce back. He’s a great player. We’ll help him. We’ll try to see if we can get him into a better groove. But he’ll be fine.” (AP)