GIPASIDAN-AN kadtong buot mohimo og transaksiyon sa nagkadaiyang buhatan sa Kapitolyo karon nga isibog na lang una kini sa laing adlaw tungod sa ipahigayon nga earthquake drill.
Ang Sugbo maoy napilian nga sentro sa National Simultaneous Earthquake Drill lukop nasud.
Karong alas 9:00 sa buntag, sugdan ang dungan nga nasudnong pagpahigayon sa earthquake drill.
Ang Sugbo, partrikular na ang Kapitolyo, maoy napili nga dapit diin himuon ang ceremonial nga pagpatingog og wang-wang nga signal sa pagsugod sa nasudnong kalihukan.
Sigun sa Provincial Disaster Risk Reduction and Management Office (PDRRMO) molungtad og duha ka oras ang drill, diin ipakita kon unsaon pagresponde sa nagkadaiyang rescue groups dinhi sa Sugbo ang posibleng 7.8 magnitude nga linog o ang gitawag nga “the big one.”
Ang susama kakusog nga pagtay-og, gitumbok sa Philvocs nga makamugna og minilyong kadaot sa kabalayan ug imprastraktura, pagkakalas sa libuan ka kinabuhi ug daghang angol.
Sigun sa labaw sa PDRRMO Emergency Response, Rhafael Luche, lakip sa scenarios nga ilang ipakita mao ang collapse structure rescue ug uban pang medical emergency.
Ug tungod ning kalihukan, maapektohan ang serbisyo sa nagkadaiyang buhatan sa provincial government o kaayo matagad ang transaksiyon.
Gawas sa Kapitolyo, lakip sa mga dapit dinhi sa Sugbo nga mopahigayon og earthquake drill mao ang Vicente Sotto Memorial Medical Center ug ang Camp Lapulapu nga base sa AFP-Central Command.
Giawhag sa PDRRMO ang tanang local government units probinsiya pagsalmot.
Matod ni Luche, mopahigayon usab sila og communication exercise tali sa nagkadaiyang LGUs karon.