Nadela: Maninda unya mo-eskwela

NASIBOT ko sa sugila­­non sa duha ka ti­­nun-an sa Cebu City Central School nga akong nahimamat niadtong Hu­webes.Atol sa ilang praktis sa pagpaso para sa ilang ika-103 nga closing ceremony na-interview nako sila si Mark Ryan Abad ug John Clifford Generalao pulos tinun-an sa Grade 6. Sigun sa ilang mga magtutudlo dalaygon ug sulondon ang gihimo sa duruha aron molampos sa ilang pagtuon. Si John Clifford nga taga Barangay Day-as, Cebu City maninda og sigarilyo, candy ug checheria sa eskina Colon ug Osmeña Blvd. Samtang si Mark Ryan naninda og mga souvenir items sa palibot sa Magellan’s Cross. Gihimo nila kini gikan sa adlawng Lunes hangtod sa Domingo.  Pero sa oras nga may klase ang duha tua sa  classroom magyampungad.

Gihimo nila kini sa nakalabay nga unom ka tuig. Ug karon padung na silang mopaso pagtimaan  sa ilang pagtapos sa elementarya. Sa ilang asoy di sayon ang kasinatian nga ilang naagian. Dunay pa­­nahon nga motunga sila sa klase nga gutom. May higayon nga ma-late sila. Pinaagi sa pag giya sa ilang mga ginikanan nakab-ot ra gyud nila ang pasiunang kalampusan ug nipadayag ug kaandam pagpadayon sa pagsakrapisyo alang sa mosunod nga katuigan unyag tungtung nila sa junior ug senior high school. Ang ilang mga maestro ug maestra  mapasigarbohon kaayo sa ka kugi ug determinasyon pagpadayon sa pag-eskwela taliwala  sa ka­wad-on nga natagamtaman sa ilang mga pamilya. Ako mi­­ngon sab nga angayang pasi­dunggan ang ilang mga gini­kanan pagdasig ug pag giya ni­lang duha pagpadayon sa pag­tungha bisan kung nagpas-an sila ug responsabilidad pagtabang nga maka tigum ug kuwarta pinaagi sa pagpaninda. Sanglit ang pagpaninda maoy tinubdan sa ilang panginabuhi niunong sila bisan sa kalinghod sa ilang salabutan. Tinuod, taas pa kaayo ang da­lan nga ilang latason aron maandam ang ilang masilakon nga ugma. Pero sa ilang gipakita karon way lalis nga sila si John Clifford ug Mark Ryan hayag kaayo ug kaugmaon. 

Mao sab ni ang akong hagit sa mga tinun-an nga susama ug kahimtang nilang du­­ha. Ayaw patuyangi ang ka­wad-on nga ma­himong babag pagkab-ot og edukasyon. Sa mga arang-ara­ngan nga wa sab magseryo­so sa pag-eskwela unta mahimong ehemplo ang sugilanon nilang duha aron kamo madasig nga mag ti­nuod na sa inyong pag-eskwela. Ayaw usiki ang pa­nahon. Ug labaw nga ayaw pakyasa ang damgo sa inyong mga ginikanan.