DAVAO OCCIDENTAL -- Nagkadaiyang programa ang gilusad sa mga local government units aron saulogon ug ipakita ang gahum sa mga kababayen-an ilabi na sa pagpanerbisyo sa publiko nga kaya ra nilang mahimo ang mga buluhaton nga lalaki lang ang mohimo kaniadto.
Ang kasaulogan dunay tema nga “We make Change for Women” diin gihatagan og dakong bili ang Magna Carta for Women.
Sa dakbayan sa Malita, nahimong guest speaker si Representative Lorna Bautista-Bandigan niadtong Biyernes, Marso 31, sa dihang gitak-opan ang selebrasyon pinaagi sa kulminasyon.
Gihatagan og bili ni Bandigan ang mga kabag-ohan nga nahitabo sa mga kababayen-an ilabi na kadtong nanerbisyo sa publiko sama kaniya.
Sukwahi kaniadto nga mga lalaki lamang ang sagad manarbaho alang sa serbisyo sa katawhan apan karon dako na og kausaban sanglit daghang mga lider sa nasud mga babaye na nga mipakita sa ilang katakus.
Sa dakbayan sa Digos, gitataw sab ni Konsehal Mila Llanos nga daghang kababayen-an ang nisugal sa ilang kinabuhi aron lang mabuhi ang pamilya.
Usa sa mga ehemplo ug angayang ilhon ang mga kababayen-ang milangyaw sa laing nasud kun mga Overseas Filipino Workers nga gi-aguwanta ang kalayo sa pamilya aron lang mahatagan og kaugmaon ang ilang mga anak.
Bisan ang mga babayeng magtutudlo nga nag-antus pagsaka sa kabukiran aron mahatagan og edukasyon ang mga tinun-an, gidayeg sab sa opisyal.
Nag-selebrar sab sa Women's Month ang lungsod sa Bansalan nga gipangunahan ni Mayor Quilin Sarte, kinsa nagsaulog sa iyang adlaw'ng natawhan niadtong Huwebes.
Giila sab sa mayor ang kaisog sa ubang kababayen-an nga moserbisyo sa publiko diin ang uban nagbuhis sa ilang kinabuhi sama sa babayeng sakop sa Scene of the Crime Operatives nga si Police Officer 3 Jeden Mei Rabor, apil namatay dihang gibanhigan sa mga rebeldeng New People's Army ang patrol car nga gisakyan niini niadtong Marso 8.