PADAYONG gilutos karon sa Philippine Army ang mga sakop sa New People's Army (NPA) nga ilang gikapinusilay sa Barangay Tagbinunga, Mati City, Davao Oriental niadtong Huwebes, Marso 30.
Sa maong hitabo, duha ka sundalo ang naangol samtang usa ka wa mailang NPA ang namatay sa pinusilay.
Mga sundalo nalambigit sa 20-minute nga pinusilay sa grupo sa 40 ka NPA nga sakop sa Pulang Bagani Company (PBC) 6 sa Sitio Bukadan sa Barangay Tagbinunga.
Usa ka improvised explosive device ang mibusikad nga misamad nila Private First Class (PFC) Jouie Oliveros ug PFC Anatoly Lechoncito, kinsa managsamang naangol sa shrapnels.
Mga naangol gitambalan sa Camp Panacan Station Hospital sa Davao City samtang ang patay nga lawas sa NPA gidala sa Padilla Funeral, MatiCity.
Usa ka sakop sa NPA nga si Ricardo Bisaya, alyas Jonas, kinsa gikan sa Tarragona, Davao Oriental, mitahan sa 28th Infantry Battalion sa Barangay Don Salvador Lopez, Mati City pipila ka oras human sa engkwentro.
Si Bisaya mitahan tungod sa kahadlok nga mamatay siya tungod kay daghan sa iyang kauban ang naigo sa bala.
Nasayran nga gatusan ka pamilya ang mibakwit sa lugar tungod sa kagubot mao nga giatiman sila sa lokal nga gobyerno.
Sa maong adlaw, usa ka menor nga babaye ang mitahan sa 701st Infantry Brigade nga nagkampo sa Sitio Magay, Barangay Don Martin Marundan, Mati City.
Mitahan ang menor de edad nga si Shena, 14, medic sa NPA.
Kahinumdoman nga iyang inahan, Leonila, midangop sa media aron hangyuon ang NPA nga buhian ilang anak nga narekrut niadtong Enero 2017.
Si 10th Infantry Division Commander Rafael Valencia midayeg sa kaisog sa mga sundalo nga nakiggiyera nila sa mga rebelde.