MIBUTO ang isyo karon kabahin niining mga immoral nga kalihukan sa pipila nato ka mga opisyal sa gobiyerno human magka-away sila si House Speaker Pantaleon Alvarez ug ang higala niini nga si Davao del Norte Congressman Tonyboy Floirendo, tag-iya sa dakong banana plantation didto sa iyang sa lalawigan. Ang hinungdan sa ilang panag-away mao kay nag-away ang ilang mga kulukadidang o mga babaye sa kinabuhi. Matod pa, gisagpa sa babaye ni Alvarez ang babaye ni Floirendo atol sa pagbisita sa duha uban ni Presidente Rodrigo Duterte sa Bacolod City niadtong miaging tuig.
Si Alvarez, kinsa buwag sa iyang asawa, adunay kulukadidang nga usa ka batan-on. Samtang si Floriendo, buwag usab sa iyang asawa nga si kanhi Miss Universe Margie Moran. Human mapagya ang kabahin sa relasyon ni Alvarez, mi-angkon kini nga adunay kabit ug daghan og mga anak sa laing mga babaye gawas sa iyang una ug ikaduhang asawa.
Dungan sa pag-angkon ni Alvarez, mihagit kini sa iyang mga kritiko nga ipa-disbar siya isip usa ka abogado. Gikastigo gyud og maayo si Alvarez sa iyang mga kritiko gumikan kay pagpahimulos kining gihimo ni Alvarez sa kababayen-an ug immoral. Dili unta niya angay kining himuon kay usa siya ka public official nga angay untang mahimong modelo.
Dili man siguro sala nga ma-ibog kita o mahigugma sa laing binuhat. Ato kanang katungod. Apan mahimo lang kanang immoral kon ikaw kasado sa laing babaye o ba kaha aduna nay pamilya. Unya ang nakaporke kon ang atong mga opisyal sa kagamhanan mogamit na sa kuwarta sa gobiyerno aron pagtubag sa mga personal nga panginahanglan sa ilang mga kabit.
Si Alvarez dili susama sa kahimtang ni Duterte nga annulled na sa iyang unang asawa ug adunay kulukudidang o common law wife karon nga si Honeylette Avancena. Gani aduna silay anak. So, sa mga mata sa tawo dili illegal ug immoral kining gihimo ni Pres. Duterte. Maayo siguro nga hawanan una ni Alvarez ang dalan sa iyang personal nga kinabuhi pinaagi sa pag-anular sa iyang kaminyuon aron wala nay mokuwestiyon sa iyang personal nga kinabuhi.
(bobby@sunstar.com.ph)