GIDUSO sa Land Transportation Franchising and Regulatory Board (LTFRB) ang bag-ong desinyo alang sa public utility jeepneys diin ang pultahan anha na ipahimutang sa kilid o curbside habig sa sidewalk.
Sa kasamtangan nga desinyo, ang pultahan sa mga PUJ naa sa habig sa dalan nga delikado alang sa pagsakay ug pagkanaog sa mga pasahero.
Si LTFRB chairman Martin Delgra niingon sa tanang denominasyon sa mga sakyanan sa nasod bugtong ang PUJ lang ang may pultahan nga naa sa danger side o habig sa dalan samtang sa mga bus, mini bus, taxi ug utility vehicles kay naa sa curbside o habig sa sidewalk.
“It's only the jeep nga mosakay ug mokanaug ang pasahero on the danger side, ngano danger side? On the road.
Ang pasahero is not supposedly on the road,” pahayag ni Delgra nga nibisita sa Sugbo bag-ohay lang alang sa konsultasyon sa Omnibus Franchising Guidelines sa transport sector sa miaging semana.
Ang bag-ong desinyo sa mga PUJ ang kabahin sa modernisasyon nga ipatuman sa LTFRB, apil na ang pagwagtang sa mga karaang jeepney.
Si Delgra namahayag nga nagtinabangay ang lainlaing ahensiya sa gobiyerno aron maayudahan ang mga operator sa PUJ modernization.