ILIGAN CITY -- Bombero nga mipatay sa kalayo, mga rescue ug volunteer group nga mi-rescue sa mga samaran ug mikuha sa mga nangamatay, kapolisan ug mga sundalo mi-guide sa mga empleyado ug mga kostumer aron makagawas sa matag building kung asa sila nagtrabaho o naabtan sa linog.
Kini ang senaryo nga nakit-an sa may Quezon Avenue sa Barangay Poblacion, alas 2:00 sa hapon, Marso 31.
Apan ang maong senaryo usa lamang ka drill o simulation exercise nga gipangunahan sa Iligan City Disaster Risk Reduction and Management Office (ICDRRMO) nga kabahin sa 1st Quarter National Simultaneous Earthquake Drill.
Gisalmutan kini sa 15 ka mga establisimento sa Iligan nga gilangkuban sa tunghaan, mga tindahan, kan-anan, department store ug mga bangko.
Matud pa ni Patrick Nunez, head sa ICDRRMO, nga pagsanong kini sa kamandoan sa National Disaster Risk Reduction and Management Council nga mopahigayon og earthquake drill ka-usa matag semana.
"We are performing some scenarios in the drill, participated in by all rescue groups in Iligan City to really evaluate the preparedness of the rescue and establishment employees in the area are also participating kay gusto makit-an how they will respond kung dunay real earthquake nga masinati," miingon si Nunez.
Sa impormasyon nga nakuha sa SunStar SuperBalita, wala pa'y nakit-ang fault line sa Iligan, base sa pinakaulahing komunikasyon nga nadawat sa Task Force on Environmental Management sa kagamhanang lokal gikan sa Philippine Institute of Volcanology and Seismology (Phivolcs) nga wala pa'y na-record nga faultline ang maong ahensiya sa Iligan.
"Nagsulat ang local government unit Iligan, through the Task Force on Environmental Management, ngadto sa Phivolcs aron mangayo og mapa sa mga disaster prone areas sa Iligan, including fault lines, para maka-marking ta, pero nagtubag kini nga walay nakit-an sa Iligan, didto ra somewhere in Lanao del Sur," miingon si City Planning Officer Architect Gil Balondo.
"Pero dunay indications nga duna tay mga liquifactions, o kining area nga lapok o humok ang ilawom pero yuta o batuhon sa ibabaw, delikado ni mo-unlod kung dunay kusog nga linog bisan sa silingan ra nga areas. Subject ni karon sa scientific study," dugang ni Balondo.