DAVAO DEL SUR -- Milibot karon ang Network for Animals sa probinsiya aron i-krusada ang Animal Welfare Act ug ikampanya ang hugot nga pagbabag sa mga bugno sa kabayo sa kabarangayan.
Sumala ni Medino Yebron, representante sa Crusade Against Animal Cruelty Worldwide nga dili na angayang mohimo og ordinansa ang mga lokal nga gobyerno sanglit aduna nay Republic Act 10631 nga nag-amenda sa R.A. 8485 kun nailang Animal Welfare Act of 1998.
Matud ni Yebron nga nakaabot sa ilang kasayuran nga gigamit sa ubang sugarol ang mga lider sa Indigenous People's (IP's) diin gihatagan og salapi aron motugot nga magpabugno og kabayo sa mga barangay.
Apan sumala ni Yebron nga bisan og adunay balaod ang mga tribu nga mahimo silang makapabugno og kabayo sa panahong aduna’y okasyon, dili sila exempted sa balaod.
"Naa sa ilang balaod na pero usa lang ka pasundayag ug wa nila gitugtan nga pasugalan ang mga bugno sa kabayo," pasabot ni Yebron.
Matud niya nga panahon na aron mapakgang ang kabangis sa mga tawo ngadto sa mga hayop ug usa niiini ang pagpabugno og mga kabayo.
Giklaro sab niini nga ilawom sa balaod adunay mga higayon nga gitugtan nila nga ihawon ang mga iro sa talagsaong higayon ug kon gikinahanglan, apan dili kay himuong tradisyon.
Gidason ni Yebron nga nasayud silang adunay mga eksploytasyong nahitabo sa mga IP’s diin ginahaylo og salapi sa mga financier sa pabugno sa kabayo apan luyo niini mahimong dakpon dayon sa kapulisan ang mga pabugno nga ipahigayon sa ilang mga lugar bisan ug gihatagan og permit sa mga pamuno sa tribu. (OBD)