USA sa mga nakapadasig kang Davao City Mayor Sara Duterte-Carpio sa pagpili og bag-ong direktor sa kapulisan sa dakbayan mao ang natigayong dispersal tali kapulisan sa Kidapawan City ug ang giingong mga mag-uuma.
Ang mayor nakig-meeting sa bag-ong napili nga direktor sa Davao City Police Office Senior Superintendent Alexander Tagum aron hisgutan ang pagpatunhay sa kalinaw ug seguridad sa dakbayan ug ang pag-welcome kaniya sa Davao City.
“Tulo sila gipilian nako, but he [Tagum], extensive gayud siya, mao tong siya gayud akong napili among them,” sulti ni Duterte-Carpio sa mga tigbalita niadtong Martes, Abril 4.
Si Tagum ang nakontrobersiya hangtud ning kasamtangan human sa natigayong maduguon nga Kidapawan dispersal nga gikamatay sa duha ka giingong mag-uuma ug gikasamad sa mga militante ug sakop sa dispersal team.
Sumala sa mayor nga dunay mga nahitabong rally sa dakbayan sa Davao nga susama sa protesta sa mga militante sa Kidapawan City, Abril 1, 2016.
“Apil na ang Kidapawan incident sa akong mga gi-consider because naay mga similar nga panghitabo diri sa atoa sa Davao nga mga ingon ana pod,” sumpay sa mayor.
Tungod niini, kampanti ang mayor mahimo gayud ni Tagum ang pagpanalipod sa katawhan sa dakbayan sa Davao pinaagi sa mga kasinatian ni Tagum.
“I'm sure he learned a lot from that experience and situation, so that kung naay mahitabo ana diri sa Davao City he will know what to do,” dugang sa mayor.
Gidugang sab sa mayor nga wala siya mabalaka kung dunay matigayon nga dagkong rally gumikan dunay maximum tolerance nga ipatuman ang kapulisan kon madisturbo na ang publiko.
“Kung gusto nila mag-rally diha sa gawas, okay lang man, naa man tay maximum tolerance para sa mga ingon ana,” sulti sa mayor.
Tuod man, igo lang migawas ang mayor sa Camp Domingo Leonor (barracks) niadtong Martes, mibutho ang mga militante dala ang ilang mga placards diin gisiyagit ang hustisya sa giingong Kidapawan Massacre.
“I will die and live in that commitment to ensure freedom of expression to ensure democracy in our country; if they want to express their freedom of expression, then I will respect that,” sulti ni Tagum.