Garcia: Pamamupus king Pamagaral (Graduation)

“Pauli ning ika pekamakamal da kang kakaluguran, sasabyan Ku keka ing pekamapampang dake ning belwan. Pakirandaman mu Kanaku iti, pauli ning para king ikakayap mu iti. Parati mu Kung isipan at magi kang talasuyu Ku. Samban mu Ku at midaun kang pamigalang Kanaku. Kanita dasnan Mu kung alang kamalyan.

Pangaku Ku keka ini uling ika ing Kanakung pekamakamal a kakaluguran.

Lakwan mo ngan ding sablang kauryan ding kapanyamban at sumuku ka Kanaku.

Ikabus da ka karing sablang kablas ding kasalanan. E ka tatakut.

Ing makapampang belwang ini e malyaring ipamalino karetang e mapagdimut,
o makaparikil, o makasuglung king pamanyuyung makaparikil, o karetang marirya Kanaku.”

~Dalit ning Kakataskatasang Panginwan|Dangka 18, Sunis 65
(Bhagavad Gita|Chapter 18: Verses 64-67)

***

Nung ababasa mu ini, abe, keraklan megaral ka. Mekad meyari ka naman o agyang makananu mu mebyasa kang mamasa. Maulagang bage ing pamagaral. Nung e ya magaral ing tau? Lakwas na king panaung ini? Dumanup ya at malakwan ya king kasaplalan.

Deng kekatamung pipumpunan o ding minunang mebye kekatamu, e da binang pepaulagan ing pamagaral. Kanita pin kanu, ngara deng mangatwa, Katun at Kartilya mu ing ayari ding anak a talapagaral matula na la. Malyari na lang mamasa o mekad makapanintunan na mu naman.

Itang apu kung babai, mekaturu yang katun aging kadwa mung balitang ing ayari na. Byasa neng sumulat at mamasa agyang Kastila. Buri nang sabyan nita, mayap ing pamanuru da inyang panaung ita.

King kasalungsungan, deng talapagaral e no binang magkasakit anti kanita. Bisa lang manaluse, e no munta keng aklatan, ken na la mung internet. I-Google da na mu ing buri dang abalu. Ita agyang nanu pang uri ning belwan ing panigaralan da. Inya pin sana, deng aklat ngeni bala mebawas na la ulaga. Mebawas na la mu naman bilang uling ken mung internet abalu mu ing segana-gana. Mapupus ing pamagaral da—ing laman ning internet yang laman na mu naman ning utak da.

Ing sakit keng internet dakal a kamulangan nung e man kalaraman. Ing alang ulagang belwan ya ing ababalu da reng tau. E da na dirinang pansing ing ulaga ning belwan dikil king belwan king Apung Ginu at nung nanu ing kaburyan Na. Inya ala mu namang makibalu king pamamupus king pamagaral king labwad ayti. Alang makadya, nung atin man, king pamanuli king tune tamung pibale-bale—ing kayaryan ning Ginu.

Ing bye tamu keti king yatu metung a pamagaral bang makapagbalik tamu king tune tamung santungan?king karinan ning tune at alang panayang-kapalit a lugud at alang anggang lingap ning Ibpa tamu ngan. E kasing saguli ning isipan ding keraklan a ing pamagadya king tawling inawa pota namung malapit na ing kamatayan. Bakit? Kasi ala namang metung man kekatamung makabitasa nung kapilan ya mate.

Nung makadya tamu at menigaral tamung makirandam, tungge at ganaka king Apung Ginu, king lagyu na, amanu na, aral na at dapat, makadya tamung muling masalese Kaya. E parasakali ing pamanuli o pamamupus king pamagaral ayti. E patsamba-tsamba.

Nung makananu ing pamanigaral at pamiadya king pipagaralan, makanyan mu naman ing pamanuli Kaya.

***

Dake Talabaldugan:

1. kalibangbáng – (palagyu) talubang a malati. English – species of small roadside butterfly. Alimbawa king pamangamit: “Mamagalto la reng kalibangbang pilatan ning kauran at ning kaleldo agnan ning pamamalulaklak ding sampaga.”

2. kalikasuk – (palagyu) asuk manibatan king dapug o silab a maragul. English – very thick black smoke. Alimbawa king pamangamit: “Mamalipatu ing kalikasuk kabang mangasilab la reng impun tanaman king lele ilug.”

3. kalikaw/kaliku – (palagyu) kalikut, gogo da ring taliri. English – poking and stirring with the finger. Alimbawa king pamangamit: “Alang patugut ing kaliko nang Basti keng paksi inya milako ku ganang mangan.”

4. kalikul – (palagyu) kalikut, kalkal, kulkul. English – poking or probing into a tiny hole to get rid of its content. Alimbawa king pamangamit: “Alang pagugut a kalikul ing gewa na king gilagid ning mananggal ipan, e ne pa mu rin abagut ing bagang nang Dadung.”

5. kalikut – (palagyu) pangdaldak at pangogo mama (samat, api at luyus). English – a thin bamboo or metal tube with a poking rod used in the preparation of betel chewing. Alimbawa king pamangamit: “Asne kasora i Tasi neng abaldug neng Isang ing kalikut para king mama na, keng lalam bale at uling sanap-sanapan ing albug, e na ne ikwa pa.”

***

PAMANGAPAMPANGAN: Anting Katoliku, ing limbun metung yang senayan a makatatak na king kekatamung pamisip at pusu inya pati na kasebyan atn tamu —“Makaba man ing limbun, king pisamban ya pa mu rin magwakas at taluntun.”

Buri dang sabyan, nanu mang kasakitan o kapibabatan, mayari mu rin king nung nu ya makaparikil, o king aliwang salita?king tagumpe.

Anti reng memamupus king pamagaral da king kasalungsungan, ngeni naman palutan da ing tenam dang sipat, tyaga at sikanan-lub bang dasan da ing karelang tagimpan at ding pengari da.

Alimbawa king pamangamit: “Ditak namung kapibabatan at mikabus na ka, uling makaba man ing limbun, king pisamban ya pa mu rin magwakas at taluntun.”

***

Agkatan da kang mambag o midake nanu mang Kapampangan a kawatasan, sanese, sisti, kasuryan o nanu mang dikil king Kapampangan.

Nanu mang kutang o sisti king misulat king Kapisik, malyaring ikutang o malinawan king talasulat.

Pakiparala king email address, garciakragi@yahoo.com o iyaus o i-text king +639988948624 o +639423924399.

Nung karapatdapat ya’t makayagpang king dalerayang tuntunang Kapisik, masa kang mirinang kapakibatan at milimbag ya sanu man kareng tutuking dangka ning Kapisik. Ipisik me, abe!
style="display:block; text-align:center;"
data-ad-layout="in-article"
data-ad-format="fluid"
data-ad-client="ca-pub-2836569479021745"
data-ad-slot="1977900730">


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph