NASIKOP ning bag-o ang tulo ka mga langyaw nga nahilambigit sa gitawag nga ATM skimming. Gikopya ang personal identification number (PIN) pinaagi sa usa ka skimming device nga gipatapot sa mga ATM kon automated teller machines.
Duna say nabilanggo tungod sa pagkopya sa mga credit card ug gigamit sa pagkobra sa kuwarta sa laing tawo o kaha pagpamalit og mga butang pinaagi sa online shopping. Sa credit card, mahimo nga mo-cash advance, busa ang mga sindikato mahimo sab nga mokobrag kuwarta ginamit ang credit card.
Kining maong mga matang sa panikas gisilotan sa Republic Act 8484, ang “Access Devices Regulation Act of 1998.” Sumala ning maong balaod, ang access device “is any card, plate, code, account number, electronic serial number, personal identification number, or other telecommunications service, equipment, or instrumental identifier, or other means of account access that can be used to obtain money, good, services, or any other thing of value or to initiate a transfer of funds (other than a transfer originated solely by paper instrument).”
Ang sagad sa mga panikas ginamit ang mga access device mao ang paghimog peke nga access device, pangopya sa mga account number ug PIN number unya gamiton aron makakuhag kuwarta, mga butang, serbisyo ug uban pang mga butang nga dunay kantidad ug pagbalhin sa pundo gikan sa usa ka account ngadto sa laing account.
Unsa may angay nga buhaton niadtong mawad-an sa iyang credit card ug uban pang mga access device aron di siya manubag sa illegal nga paggamit niini?
Kinahanglan nga ipahibawo dayon ang pagkawagtang o pagkahanaw niini nga sa nag-isyu sa maong access device, lakip sa mga detalye ug sirkumstansiya sa pagkawagtang niini. Ning paagiha, ang holder sa access device way tulubagon sa paggamit sa access device sa panikas.
Unsa man ang mga buhat nga gidili ning maong balaod nga pagpanikas ginamit ang access device? Naglakip kini sa paghimo, paggamit ug “trafficking sa peke o mini nga mga access device. Ang paggamit sa access device mao ang pagpanikas nga makakuhag kuwarta ug mga butang nga dunay kantidad. Matawag nga trafficking kon dunay daghan nga unauthorized access devices o kaha nag-apply og daghang access device.
Unsa man ang silot sa pagpanikas ginamit ang access device?
Sumala ning maong balaod, ang silot naglakip sa multa nga P10,000 o kaha duha ka pilo sa kantidad sa salapi o butang nga nakuha ginamit ang access device ingon man pagkabilanggo nga di moubos sa unom ka tuig hangtod sa 20 ka tuig.
Kon attempted stage and maong krimen, ang silot katunga sa multa ug sa pagkabilanggo. Kon frustrated stage, two-thirds (2/3) sa multa ug sa pagkabilanggo.
(edbarrita@gmail.com)