Sugilanon: Tulog na, palit ta ugma

Gally T. Sayson

Nivel Hills, Busay, Cebu City

“FRED, ayaw pagdugay, ha. Uli og sayo,” matod sa asawang si Mina.

“Dili ko kaseguro, Min. Nahibalo ka na bitaw nga trapik kaayo kon hapon, kay tingpamauli.”

“Paninguhaa lang nga makauli kag sayo kay magkuyog ta sa birthday party sa akong amiga.

“Kon di ko kauli og sayo, moapas na lang ko nimo didto.”

“O, sige. Tawgon ko na lang ka sa imong selpon kon tua na ko sa parti.”

Kanunay higabhian si Fred sa pagpauli gikan sa iyang opisina sa Alabang tungod sa kahuot sa trapik. Arang-arang na lang sa buntag kay di kaayo tanto kahuot ang trapik. Nag-abang lang siya og balay sa Cubao ug nakahunahuna siya nga mangita og kabalhinan nga duol sa iyang opisina. Labing maayo kon sa Alabang siya makabalhin o kaha bisan sa Sucat.

“Sa Sabado ug Dominggo mangita kog kabalhinan nga balay,” namulong siya sa kaugalingon.

Alas singko sa hapon nagsakay na si Fred sa iyang kotse aron mopauli sa Cubao. Apan sa Sucat pa lang halos di na moirog ang mga sakyanan sa hilabihang kabaga sa trapik.

“Hesus! Nagdasok na man sab ni!” matod ni Fred sa kaugalingon. “Unsa na man sab kahang orasa ko makauli niini?”

Alas diyes na sa gabii dihang miabot sa balay si Fred. Tungod sa labihang kakapoy, igo lang niyang gihubo ang iyang amerkana ug kurbata dayong higda sa kama.

Apan wala madugay mikuriring ang telepono. Iyang gipunit, “Hello!”

“Fred, mitawag ko nimo sa opisina, nakalakaw ka na kuno, matod sa sekretarya. Mitawag ko sa imong selpon, sige og ring apan way mitubag,” ni Mina.

“Nakalimtan nako ang akong selpon, tua sa drawer sa akong lamesa. Uli na lang kay kapoy kaayo ko!” ni Fred.

“Sige, Fred, mouli na ko,” ni Mina nga mibutang sa telepono.

Paghiabot ni Mina sa balay nag-shower una siya. Human og butang og pahumot sa iyang lawas mitupad paghigda kang Fred. Iya kining gigakos ug giungad-ungad ang nawong niini. Apan tungod sa kakapoy wala gyud mokihol si Fred. Iyang giablihan ang long sleeve nga dentro nga gisul-ob sa iyang bana ug gihapuhap ang balhibuon nga dughan niini. Apan wala gayud mokihol si Fred.

Mao nga gihunghongan niya kini, “Fred, wa na koy panti.” Apan wa kini motubag.

Gisubli ni Mina ang paghunghong, “Fred, wa na koy panti.”

Miungol una kadiyot si Fred una motubag sa hinay nga tingog, “Sige, tulog na. Palit ta ugma.” (Katapusan)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph