ANG Philippine national men’s basketball team nagmalampuson sa unang duwa niini batok Indonesia, 81-52, sa 2015 Southeast Asian Games kagahapon sa OCBS Arena Hall 1 sa Singapore.
Ang Gilas, nga gituohang modominar sa kompetisyon, gipangulohan ni Kiefer Ravena pinaagi sa iyang 17 apuntos, nihatag og 16 puntos si Troy Rosario samtang niamot og 15 puntos si Almon Vosotros.
Ang Pilipinas giingon nga gisayonan lang sa maong duwa diin nihatag lang kini og kahigayunan sa Indonesia nga makamugna og upat ka puntos sulod sa unang quarter.
Wala makapuntos pagbalik ang Indonesia hangtod 2:19 na ang oras sa maong quarter.
Apan sa second quarter, naninguha ang Indonesians apan gipakuratan niini ang Pilipinas pinaagi sa 8-0 mnga rally aron himuong usa na lang ka digit ang gintang sa ilang puntos.
Sa halftime, nainat og balik sa Pilipinas ang ilang labaw, 35-24.
Nakaduol pagbalik ang Indonesians, 28-35, sa pagsugod sa 3rd quarter ug nahimong kulbahinam ang duwa.
Human niini, ang Gilas nagpabuto og 25-6 run sa pagpangulo ni Ravena aron dominahon na’g sugod ang duwa.