GIBASURA sa mga nag-organisar sa Southeast Asian (SEA) Games sa Singapore kagahapon ang hangyo sa Pilipinas nga gender-testing batok sa usa ka sakop sa Indonesian women’s volleyball team.
Ang reklamo sa Pilipinas batok kang Aprilia Manganang, 23, gibaliwala sa organising committee SINGSOC human nila gisusi ang mga dokumento sa medical experts.
“SINGSOC has been informed by the South East Asian Games Federation medical committee that they have reviewed the documents submitted by the Indonesian volleyball team and that the appeal has since been rejected,” pamahayag sa SINGSOC.
Sa sayo pa, ang Philippines delegation mikompirmar nga ilang gireklamo ang gender ni Manganang ug nihangyo sila og gender test aron maklaro ang tanan.
Si Manganang nakadawat og boo gikan sa mga tumatan-aw kagahapon dihang gipukan sa Indonesia ang Philippines, 25-22, 25-20, 25-14 sa Pool B opener.
Matod pa nga ang abilidad ni Manganang susama sa usa ka lalaking magduduwa.