LIMA ka mga piniriso mingpuga human gigabas nila ang berha sa Compostela Police Station kagahapon sa kaadlawon.
Mga alas 5:20 na sa buntag nadiskobrehan sa kapulisan ang pagpuga sa lima sa 38 ka mga binilanggo.
Bisan kon dunay kahigayunan nga makaeskapo, ang 33 ka mga kaubang piniriso wa mokuyog.
Wa na igkita sila si Giovanni Tapayan, 40 , taga Mulao Compostela nag-atubang sa kasong pagpamaligyag drugas; Joel Cuyos, taga Guiwanon, dunay kasong illegal drugs; Joseph Mahinay, 33; Ruben Catipay, 19, taga Cabadiangan, dunay kasong kalapasan sa anti-fencing law; ug Nelson “Watie” Agbay, taga Brgy. Poblacion sa illegal nga sugal.
Si SPO2 Jaimee Marolina, sa Compostela Police Station nga maoy desk officer ug jailer maoy nakadiskobre sa pag-eskapo sa lima.
Siya gimandoan ni Compostela Police chief, Chief Inspector Romeo Caacoy Jr. sa pagduso sa iyang pagpasabot sa hitabo karong adlawa.
Ang front desk nahimutang sa atubangan sa police station samtang ang bilanggoan naa sa luyo.
Mga alas 5 kagahapon sa hapon, nadakpan sa team ni Caacoy si Catipay, giingong ilado nga kawatan og motorsiklo sa bukirang barangay sa Cabadiangan.
Matod ni Catipay sa kapulisan nga nieskapo siya kay gimingaw siya sa iyang pamilya.
Usa ka kinawat nga motorsiklo ang nabawi gikan kang Catipay, kinsa nitudlo kang Agbay nga maoy utok sa ilang pag-eskapo.
Ilang gigabas ang rehas aron makalusot.
“It is possible a saw was smuggled inside," sulti ni Caacoy sa Sun.Star Cebu.
Matod niya nga kuwang siya og mga ginsakpan kay ang uban niini gipabantay sa mga dapit diin gipahigayon ang tigom sa mga opisyal sa Association of Southeast Asian Nations (Asean).
Ang bilanggoan duna lang untay masulod nga walo ka mga piniriso.