NAHIDANGAT sa ospital ang bag-ong pambato sa Clevelend Cavaliers nga si Matthew Dellavedova human sa Game 3 sa National Basketball Association (NBA) Finals kagahapon.
Gumikan sa grabe niyang paningkamot hilabi na sa pagdepensa sa labing sinaligan sa Golden State Warriors nga si MVP Stephen Curry, si Dellavedova nakasinati og grabeng cramps sa iyang tiil.
Ang Australian basketball star nimugna og 20 puntos sulod sa 38 ka mga minutos sa 96-91 nga kadaugan sa Cavaliers nga nakahatag kanila og 2-1 nga bintaha sa best-of-seven series.
Si Dellavedova, kinsa maoy gitahasan sa Cavaliers sa pagpuli sa luna ni All-Star Kyrie Irving sugod sa Game 2, gidapatan og IV treatments sa Quicken Loans Arena human sa duwa sa wala pa siya gisakay og ambulansya paingon sa ospital.
Gituohang masayran ang kondisyon ni Dellavedova karong adlawa atol sa praktis sa Cavaliers.
Dili gyud lalim ang gipakita ni Dellavedova sa duwa. Adunay mga higayon nga mo-dive gyud siya sa bola.
“He’s going to throw his body all over the place,” matod ni Cavaliers supertar LeBron James kabahin kang Dellavedova. “He gave everything’s he’s got.”
Ang medikal nga isyu ni Dellavedova dili na bag-o alang sa Cavaliers, nga ningkombati nang daan nga wala ang duha sa ilang mga sinaligan nga sila si Kyrie Irving ug Kevin Love.
Sa Game 3, ang laing sinaligan sa Cavaliers nga si Iman Shumpert nakasinati sab og bun-og sa iyang wala nga abaga. Hinuon nakabalik ra og duwa si Shumpert.
“When he came back on the floor with his shoulder wrapped and knowing that he wasn’t at 100 percent, it means everything to the team,” matod ni James.
“It means everything to me. It means everything to him as well. But we just can’t afford any more injuries. We’re already depleted.” (AP)