SA NATIGAYONG sunog Huwebes, Oktubre 25, sa Barangay Leon Garcia, Agdao District sa Davao City, subling nanumbalik sa akong panumdoman ang sunog sa Barangay 23-C, niadtong Abril 2014.
Matag dunay panghitabong sunog, ablihan dayon sa akong panumdoman ang pagka-ugdaw sa akong mga pinundar niadto.
Matag alas 2 sa hapon, kada adlaw'ng Huwebes makonsiderang usa ka balaan ang akong adlaw, gumikan matag gutlo sa takna di ko gyod usikan; gikan sa general cleaning padung na sa pagpahimulos sa pagpahuway, dayon pagka ugma, balik na sab sa naandan nga trabaho.
Ang among dapit sa Purok 7 sa Isla Verde, Boulevard, daw matag adlaw dunay pista, kay alegre kaayo ang mga tukar sa musika sa mga silingan; duna na gani, magpatukar, tugbangan sab sa tukar sa pikas balay, mudo lingaw kaayo ug hastang sadyaa sa among dapit.
Iskuwarter gayod kung matawag ang dapit nga bisan pa og ikambyo ang imong pagpuyo ngadto sa subdivision, di gyod mabayran og salapi ang kasadya.
Gani, labi na og “rest day” nako, magsayo dayon kog panlaba, unya, magpabukal og tubig, dayon dumdumon nako ang akong “mug” nga binulakan, butangan ko'g sinangag nga kape ug bugas, dayon buboan og binukal, ukayon, ug mopasiplat dayon kos mga silingan, kay kung naa na sila sa gawas, puwes, sugdan na ang “tsismis.”
Ambot lang nganong lami man gyod kaayo paminawon kini nga mga eksena ug senaryo kung anaa ka nagpuyo sa iskuwater? Kadaghanan nag-ingon nga kaluha na kini nga eksena sa kinabuhing iskuwater, -- ang tsismis, magluya gyod ang adlaw kung di kini mahitabo.
Pipila lamang kini sa tsapter sa akong kinabuhi sa akong pagpuyo sa Isla Verde sud sa pito ka tuig, ug wa na kini misumpay pa, gumikan wa nako mibalik og puyo sa dapit human sa sunog.
Niining kasamtangan maayo na ang kahimtang sa mga namuyo sa dapit human kini gi-debelop sa lokal nga kagamhanan sa Davao City, gani pinaagi sa maabtikong lihok sa mga opisyal sa Barangay 23-C natubag ang problema sa mga molupyo gikan sa mga serbisyo, padung na sa kahapsay ug kalinaw.
Ang kaniadtong anaa lang sa kilid sa dalan ang pagbaligya sa ilegal nga druga, karon wala na, lakip ang mga rayot sa kabatan-onan karon hapsay na. Aktibo sab ang mga barangay tanud nga naglibot-suroy sa dapit ug ang makanunayong kampanya sa kapulisan sa barangay alang sa kalinaw.
Sa sunod bulan, matigayon ang gipanindot, gipahugyaw ug mas gipabongga nga Araw ng Barangay 23-C, makigduyog kita!
Garbo nako nga ako taga Isla Verde.