PITO ang napositibo gikan sa kapin 132 ka mga kawani sa Department o Public Services sa Cebu City Government ang nasutang tiggamitan og ginadiling drugas atol sa kinalit nga drug test nga gilusad sa City Office for Substance Abuse Prevention (Cosap).
Si Dr. Alice Utlang, executive director sa Cosap, wala nibutyag kon si kinsa ang mga nagpositibo para sa pagpanalipod sa ilang katungod apan iyang giingon nga sagad kanila mga street cleaner ug loader kinsa magtrabaho panahon sa kagabhion ug kadlawon para paghipos sa nagkatag nga basura.
Si Engr. Rolando Ardosa, department head sa DPS maoy nangulo sa iyang mga sakop atol sa gipahigayon nga drug testing didto sa ilang buhatan.
Ang executive director sa Cosap nagkanayon nga ilang isumiter ang report ug mga pangalan sa nagpositibo ngadto sa buhatan ni Mayor Michael Rama. Sayo ning tuiga, laing upat ka mga kawani sa City Hall ang nasutang positibo sa shabu. Niini dul-an na sa 30 ka mga kawani ang nasakpan sukad gilusad ang surprise drug testing sa niaging tuig.
Sagad sa mga positibo gitaktak na sa ilang trabaho samtang ang uban nipaubos sa drug rehabilitation. Ang mayor una rang nipadayag nga dili siya ganahan nga adunay mga kawani sa City Hall nga drug user aron dili maduhig ang pangalan sa Cebu City Government.
Si Utlang nibutyag nga magpadayon ang ilang pagpahigayon og surprise drug test ngadto sa ubang department sa City Government.