NIPAHIGAYON og kinalit nga greyhound operation ang kadagkuan sa Cebu Provincial Detention and Rehabilitation Center (CPDRC) kagahapon.

Mga gubaon nga mga cellular phone, charger,  kutsilyo ug drug paraphernalia ang nangakuha atol sa maong operation.

Bisan sa giingong istrikto nga seguridad nga gipatuman sa mga gwardiya ug tagdumala sa provincial jail, giangkon ni acting warding Romeo Manansala nga duna gihapoy makalusot nga mga kontrabando.

Sa cell #26 dunay usa nakuhang electric wire ug tin foil nga gamiton sa pagsuyop ug shabu.

Wa isalikway ni Manansala ang posibilidad nga duna gihapoy namaligya ug mosuyop og drugas sulod sa prisohan.

Ipasusi ni Manansala kung kinsa ang nakahigayon pagpalusot sa mga kontrabando, ilabi na sa drug paraphernalia.

Nagduda gihapon siya nga dunay mga gwardiya sa prisuhan nga nasayod labot niini.

Niadtong Lunes, nipahigayon sab ug kinalit nga greyhound operation ang kadagkuan sa CPDRC sa upat ka mga selda, human gikataho ang giingong pagpagpanghulga sa usa ka piniriso ngadto sa usa ka kanhi konsehal sa lungsod sa Alcoy, pinaagi sa Facebook.

Ang inmate nga maoy gipasanginlang nanghulga ug nangilkil og kwarta sa kanhi opisyal nakuhaan og cellphone, nga maoy gigamit niini pag-access sa social networking site. Gikuha na ang maong kahimanan sa Alcoy police aron himuong ebidensiya.

Wa hinuoy kontrabando nga nakuha sa ubang selda nga gironda.