DAKBAYAN sa Lapu- Lapu nakadawat og pa­sidungog gikan sa Bureau of Local Government Finace (BLGF) ug Depart­ment of Finance (DOF) 7  isip labing unang local government unit (LGU) nga may pinakataas nga growth rate sa ilang koleksyon (revenue) kaysa laing 16 ka mga dakbayan sa rehiyon.

Mismong si Lapu- Lapu City Mayor Paz Radaza ang midawat sa maong pasidungog gikan sa BLGF atol sa usa ka regional conference ug seminar-workshop sa mga local treasurer ug assessors didto sa dakbayan sa Dumaguete niadtong Lunes.

Sa 16 ka mga dakbayan sa rehiyon, ang Lapu- Lapu may 20.97 porsyento nga average nga growth rate.

Gikan sa tuig 2012, makita nga may P833 milyones nga total actual collections ang dakbayan nga mitaas ug halos P60 milyones niadtong tuig 2013.

Ang koleksyon sa dakbayan gilangkuban sa real property tax, business tax, fees and charges ug economic enterprise.

Ang koleksyon sa dakbayan niadtong 2014 miabot ngadto sa P1.2 bilyones.

“So far, sa paglingkod nako since 2010, karon ra mi nakadawat sa maong pasidungog and I’m so happy for it. Im proud also sa mga empleyado sa Lapu- Lapu City Government sa ilang effort,” ni Radaza pa atol sa press conference niini kagahapon.

Gitataw ni Radaza nga ang pagdaghan sa mga establisamento, mga kompanya nga miabli ug mga investors nga mibubo sa ilang capital sa dakbayan maoy usa sa mga rason.

“The more companies, the more income for the city and the more nga we really return it back to the taxpayers nga among ihatag nila,” dugang sa Mayor.

Paambit ni Radaza nga ilang gipanglantawan nga mas motaas pa gyud ang ilang koleksyon ning tuiga.

Kini tungod kay matod pa nagtika- daghan na usab ang mga nanimuyo sa dakbayan tungod sa pagdagsa sa mga trabaho.