NAULIAN na ang mga inmate nga giingong nasudlan og dautang espiritu sulod sa Cebu Provincial Detention and Rehabilitation Center (CPDRC), human gihiling og albularyo.
Kagahapon sa buntag, gipaubos sila sa katekismo sa usa ka grupo sa mga misyonero aron mapalig-on ang ilang spiritual nga pagtuo.
Nakabalik na sa ilang tagsa-tagsa ka mga selda ang 12 ka mga binilanggo nga nag-wild sukad niadtong Lunes sa kaadlawon hangtod niadtong Martes human giingong nasudlan og dautang espiritu.
Matod ni CPDRC consultant Marco Toral nga nikuha sila sa serbisyo sa usa ka albularyo niadtong Martes sa gabii hinungdan nga naundang ang pag-wild ug pagpakitag grabeng emosyon sa mga piniriso.
Ang kanhi CPDRC inmate nga si Jerry Rosales, nga naila sab nga usa ka albularyo, maoy gikuha aron makatabang pag-ayo sa mga nag-wild nga inmates.
“Naulian ra man pud. Iya man tong gi-estoryahan, giingnan nga pamauli na mo. Ppamahawa na mo, ayaw na mo’g balik,” asoy ni Toral.
Si Geraldine Demecillo, 34, inmate nga maoy giingong una nga na-possess, wa nay mahinumduman sa nahitabo kaniya.
Dihang nabalik ang iyang kabuot, nabati niya ang grabeng kakapoy ug nakita niya ang daghang mga bun-og sa iyang lawas nga resulta sa pagpugong sa ubang inmates kaniya dihang siya nag-wild. AZDL
Ang gitinir niya nga hulagway sa usa ka coconut crab nga dunay sinuwat nga Latin nga iyamyam sa luyo niini maoy giingong entry point sa dautang espiritu nga nisulod kaniya.
Lakip si Geraldine sa mga babayeng inmate nga gipaubos sa katekismo sa Most Holy Name of Jesus Missionaries, pinanguluhan sa vicar general niini nga si Bro. Francis Nacional.
Nanghinaot si Geraldine nga di na mausab ang maong hitabo.
“Hesus, Ginuo ko, palimbasugi intaw’n ko, nga dili na sila makakuan nako ba, kay gikapoy na kaayo ko sa tanan. Dauga intaw’n ko sa imong gugma, dauga intawn ko sa akong pagtuo diha nimo,” niingon si Geraldine.
Nagtuo ang grupo ni Bro. Nacional nga ang kahuyang nga ispiritwal sa mga inmate ug ang gihimo niini nga pagtuo-tuo sa nagkadaiyang butang maoy hinungdan nga dali silang nataptan sa dautan.
Gipaabot sa tagdumala sa CPDRC nga mabalik na sa Sugbo ang official exorcist sa Archdiocese of Cebu nga si Msgr. Frederick Kriekenbeek, aron maoy ilang hangyuon pagbendisyon sa ilang pasilidad.
Giawhag sab ang mga inmate nga mamahimong aktibo sa mga relihiyosong kalihukan sulod sa prisuhan.