KARONG adlawa mopasaka og pormal nga reklamo ang pamilya sa walo-ka buwan nga masuso nga namatay nga si Harry Morgan Visayas sa nagkadaiyang ahensiya aron mangayo og tubag sa giingon nga pagpabaya sa St. Anthony Mother & Child Hospital dihang gi-admit sa maong tambalanan.
Usa ka seven-man team giumol sa ospital aron mosusi sa hitabo.
Kagahapon sa hapon gilubong na ang bata sa Calamba Public Cemetery ug karong adlawa na mobisita ang pamilya niini sa Department of Health (DOH) 7.
Si Michelle Ylaya, iyaan sa bata ug igsuon sa inahan nga si Marifhe Ylaya, nibutyag kagahapon human sa lubong nga bisitaon usab nila ang Commission on Human Rights ug Philippine Regulatory Commission karong adlawa.
Dugang niya nga ang medical abstract lang sa Vicente Sotto Memorial Medical Center (VSMMC) diin gibalhin ang bata, mao ang anaa sila tungod kay wa pa usab sila na clear sa SAMCH.
Matod ni Ligaya Moneva, tigpamaba sa DOH 7, nga naghuwat na lang sila sa pagbisita sa pamilya sa ilang buhatan ingon man ang formal letter sa ilang reklamo. HBL
Abli ang pamilya kon pananglitan nagkinahanglan nga i-autopsy ang patayng lawas sa maong bata. “Dili naman namo na mabalik akong pag-umangkon pero mas maayo gyud nga ma stop ang ilang pagka-incompetent sa hospital” si Ylaya nagkanayon.
Nipasalig ang medical chief sa maong tambalanan nga si Dr. Robert Denopol nga makiangayon ang buhaton nila nga pag-imbestigar diin gipangulohan kini ni Dr. Rosemarie Coronado.
Tanang medical personnel nga nalambigit sa maong insidente lakip na si Dr. Roselle Lampayan ug Dr. Barte nga kuhaan og insident report kinsa mao ang gi-alegar sa pamilya og medical malpractice.
Samtang ang pamilya sa biktima wala’y salig sa maong fact finding tungod kay posible nga ma-fabricate ra niini ang mga dokumento nga anaa mismo sa ilang tambalanan.