MANAG-AGAW nangamatay human sila gipangpusil sa gituohang ilang mga kauban kay wa magkasinabot sa ilang bahinay kagahapon sa alas 11 sa buntag sa Barangay Linao, dakbayan sa Talisay.

Mga biktima giilang sila si Junel Rabago, 36, minyo, habalhabal driver taga Sitio San Antonio, Barangay Linao, ug ig-agaw nga si Ronald Cabarida, 34, minyo usa sab ka habal-habal driver.

Ang duha gideklarar pulos sa mga doctor nga dead-on-arrival (DOA) sa Talisay District Hospital.

Si SPO2 Ybonne Illustrisimo, imbestigador sa Talisay Police Station, nagkanayon nga ang biktima gikan sa Minglanilla sakay sa motorsiklo nga gimaniho ni Rabago.

Wa sila makabantay nga gisundan sa duha ka mga lalakeng pulos nag-bonnet nga nag-angkasanay sa XRM nga motorsiklo.

Ang mga biktima ninghunong sa Sea Oil gasoline station aron magpatubil dihang ningbutho ang mga killer nga diretsong namusil kanila.

Si Rabago nakaangkon og upat ka mga samad pinusilan sa iyang dughan samtang si Cabarida nakaangkon og lima ka mga samad pinusilan sa iyang dughan.

Human sa pagpamusil, ang mga biktima gipangdala sa tambalanan samtang ang mga gunman paspas nga ningsibat palayo.

Ang kapulisan nakakuha sa crime scene sa 12 ka mga kabhang sa bala sa 9mm pistol ingon man usa ka deformed slug.

Si Illustrisimo nagkanayon nga ang motibo sa kremin nga ang ilang gisubay mao posibling panagbangi sa mga biktima ug mga killer.

Posible nga giunay sila sa pagpatay sa ilang mga kauban nga tulisan tungod sa wa pagkasinabot sa ilang bahinay.

Ang mga biktima nasubay nila nga mga notadong tulisan sa dakbayan sa Talisay ug sa ubang mga dapit.

Dunay mga biktima nga ningtumbok kanila nga maoy nanaulis.

Sagad sa ilang target mao ang mga trabahente sa lending company o mga kolektor.

Ang pumpboy nga ilang gikahinabi nibutyag nga wa siya makaila sa mga killer kay nag-bonnet.

Ang management sa gasoline station misugot na sa ilang hangyo nga ilang lantawon ang footage sa CCTV camera nga ilang gipanghinaot nga makatabang sa imbestigasyon sa kaso.

Wa matino sa kapulisan kon nag-unsa ang mga biktima sa Minglanilla.

Matod ni Illustrisimo nga nasuta nila nga modus sa duha nga mag-drive sa habal-habal pero manulis.