Obenieta: Pahinungod sa hawod

TATAW nga halangdon, taas sa atong panan-aw. Sulundon gyod bisan kinsa nga maki­ta na­tong’ matinud-anon sa iyang katungdanan. Sanglit ang tigpatu­man sa balaod mao’y gisa­li­gan nato aron mahapsay ug magmalinawon atong palibot, dayag nga dako ug bug-at gyod ang tulobagon sa atong kapu­lisan. Dili lang isog nga moharong ug mopakgang sa mga daotan, apan duna po’y kata­kos nga mopatunhay kon unsa’y matarong ug makiangayon. Aron ang hustisya mao’y hawod, maayong panaminan ang binuhatan sa mga buotan ug banggiitan nga mga sakop sa Philippine National Police (PNP).  

Saludo! Dili kinahanglang mag-presidente inig dako kon ang bata duna’y pulis nga sarang sundogon. Gani, nasayran nato nga kon wala pa unta mamatay gikan giluba sa silingan nga gituohang drug addict, kadtong alaot nga 4-anyos didto sa Barangay Duljo-Fatima buot untang mosunod ug mobarog tupong sa iyang amahan. Si PO1 Emmanuel Martinez dalaygon tuod kay bisan makapungot ang gidangatan sa iyang anak, wala siya magpadala sa iyang gibati. Wa’y sukod ang panimalos, ug dali ra natong masabtan kon nahinayak pa siya pag-unay og kumkom sa balaod pinaagi sa pag-ihaw sa giilang mamumuno sa iyang anak. Apan dili sama sa pamuno sa nasod nga lupig pa’y huramentado sa iyang pakigbatok sa mga tigpayuhot og ginadiling mga druga, ang pagbangotan ni Martinez wala mosangpot sa extra-judicial killingkun pagpatay gawas sa pamaagi sa balaod diha sa hukmanan. Igo na alang niya nga ikiha ang gitumbok nga sad-an sa kamatayon sa iyang anak. Nan, sakto siya— bisan sa linghod niyang pagsabot sa buhi pa— nga mahisama unta sa iyang amahan puhon, ug dili mag-presidente sama ni Duterte. Kay gipadayag sa iyang amahan nganong angay siya tahoron. Sumala pa sa tigdumala sa Cebu City Police Office (CCPO) mahitungod sa gipakita ni Martinez, “It’s a clear indication that our policemen have discipline.”

Disiplina mao’y ginaingon nga kinahanglanon alang sa nasudnong kalamboan. Kon kini mao’y hiyas sa atong kapulisan ug sa tanang sanga sa kagamhanan, mabungahon un­ta ang atong damgo nga mo­lungtad ra ang maayo, mo­­pa­tigbabaw. Ug kini mao’y gi­­­pa­ningkamotan nga ma­kab-ot sa PNP nga gapahigayon og “internal cleansing” kun pag­limpyo sulod sa iyang ginsa­kopan, labi na sa mga naghi­nanggaw kay nalambigit sa illegal drug trade ug sa extra-judicial killing. Nunot niining kalihokan sa PNP alang sa kabag-ohan, gikataho nga gilusad sa Cebu Police Provincial Office (CPPO) ang usa ka bag-ong tulomanon. Gitawag og “Cebu PPO RAKs (Random Act of Kindness),” gasangon kini sa kapulisan nga mobuhat og tulo ka maluluy-on nga linihokan kun binuhatan alang ni bisan kinsa matag adlaw. Na hala, padayon! Sugdi, pananglitan, sa pagsulat ug pagbuyag sa hari sa Malacañang nga wala’y kalahian sa mga kriminal ang kainit sa ulo ug kabugnaw sa dugo, gapatuyang sa iyang pagtuo nga siya’y labing hawod: labaw pa sa balaod.

(geemyko@gmail.com)