NIBIRA si LeBron James og 40 puntos, 12 rebounds ug walo ka assist aron sakwaton ang iyang Cleveland Cavaliers batok sa Golden State Warriors, 96-91, sa Game 3 sa ilang best-of-seven NBA Finals kagahapon.
Sa ilang kadaogan, labaw na ang Cavaliers og 2-1 sa ilang siris diin matagamtaman pa gihapon nila ang home-court advantage sa Game 4.
Dako kaayo ang papel sa Australian pointguard nga si Matthew Dellavedova, nga mao nagpuli ni Kyrie Irvie tungod sa knee cap injury sa Game 1.
Nidugang og dako si Dellavedova og 20 puntos, lima ka rebounds ug upat ka assist labina sa depensa ug impresibong pagprotekta sa paglambayog sa bola sa salog sa pipila ka higayon.
"Most important player for the Cavs of this series is Dellavedova," ingon si NBA legend Isiah Thomas, nga usa sa komentarista sa postgame analysis.
Nibinat ang Cavs og kinataas nga labaw nga 20 puntos, 68-48, sa 2:52 minutos nabilin sa ikatulo nga kwarter.
Nahinayhinayan kini sa Warriors pagputol ug nidikit pa sa usa nalang ka biya, 81-80, human sa tres ni Stephen Curry sa 2:22 minutos nabilin sa kataposan nga kwarter.
Apan nakamugna ang Cavs og momentum diin nasigundaan kini ni Dellavedova og foul-counted kang Curry ug sundan og tres ni James, 87-80. Mitusik lang gihapon ang Warriors diin nidikit sila og tres puntos nalang, 94-91 sa 18 segundos nabilin human sa pagpamomba ni Curry og duha ka sunodsunod nga tres.
Nakontrolar sa Cavs paingon sa kadaogan human napasulod ni James ang duha niya nga freethrow gikan sa foul iyang nakuha sa kataposang 16 segundos.
Nakapamuhonan sab ang Cavs sa ilang depensa diin nalimitahan nila si Klay Thompson nga mobira og 14 puntos diin siya ang nagulo sa Warriors nga nihuman og 34 puntos. “It’s tough,” ingong ni James sa ilang depensa. Si Curry nikolekta og 27 puntos alang sa Warriors.