NANGDAOG tanan pambato sa Cagayan de Oro ug Misamis Oriental sa pag-abri sa ilang kampanya sa 2015 ASEAN Age Group Chess Championships niadtong Martes sa Singapore.
Gipangpilde sa magsuong Canino, nga pulos lumolopyo sa Barangay Kauswagan ning dakbayan, ang ilang kalaban nga parehas taga-host Singapore.
Si Ronald Canino, nga nihimo sa iyang ikalima ka hugna pagrepresentar sa nasod sa Asean age group, nidaug kontra kang Leong Sher Her sa una nga round sa 12-under open.
Iyang igsuon nga si Ruelle mao lang nidaug sa lima ka delegasyon sa 6-under girls sa una nga round.
Nagmalampuson si Ruelle paggamit sa itom nga pyisa batok kang Lim Ruici sa usa ka Center-Counter defense nga panagkombati.
Sa pagsulat ning balita, pulos taga-Vietnam ang maatbang sa magsuong Kagay-anon sa ikaduha nga round.
Si Ronald mogamit sa itom nga pyisa batok kang Nguyen Liam Thien, samtang magputi si Ruelle kontra kang Nguyen Linh Pan.
Sa pikas bahin, gipangpilde sa pambato sa MisOr nga sila si Mee Ann Joy Baclayon ug Mary Joy Tan ilang kadaiyang kaatbang sa una nga round sa 12-under girls.
Garbo sa munisipyo sa Manticao, nidaug si Baclayon kang Tran Nhat Phuong Ha sa Vietnam ug moengkwentro kang Onongol Tselmeg sa Mongolia sa ikaduha nga round.
Mahinumduman nga si Baclayon nibira og upat ka bulawang medalya sa bagohay nahuman nga 2015 Palarong Pambansa, diin duha niana gikan sa individual ug duha gikan sa pagpangulo niya sa team.
Si Tan nidaug kang Nguyen Thi Kim Tuyen sa Vietnam ug moatbang kang Tan Huynh Thanh Truc sa ikaduha nga round.