NIBIRA ang San Miguel Beermen sa ilang ikapito nga sunodsunod nga kadaogan human nila naparot ang Talk N' Text Tropang Texters, 101-96, atol sa 2015 PBA Governor's Cup niadtong Martes sa gabie sa SMART-Araneta Coliseum.

Nikolekta si Arizona Reid og 29 puntos ug 13 rebounds aron mangulo sa Beermen samtang niabag sab si Marcio Lassiter og 15 puntos.

Nipatak sab og dako si Arwind Santos nga adunay 14 puntos ug walo ka rebounds. Lamang ang Tropang Texters sa una ug katunga sa ikaduha nga kwarter, 35-31, apan nahinayhinayan kini og wagtang sa Beermen hangtod nahuman ang una nga half sa 45-tanan.

Gikan dinha, nakabwelo ang San Miguel human nakakita sila og tsansa sa transisyon aron angkonon ang ikatulo nga kwarter, 75-67.

Nitusik og ayo ang Texters sa kataposan nga kwarter apan nahutdan sila og lahutay aron mahatag sa Beermen ang kadaogan.

Si Jason Castro nikolekta og 25 puntos apil na iyang upat ka tres sa walo nga attempt alang sa Texters.

Naginusara karon ang San Miguel sa ikaduha nga pwesto nga adunay pito ka daug ug duha ka pilde.

Nagsunod ang Alaska Aces sa ikatulo nga pwesto nga adunay unom ka daug ug duha sab nga kapildehan human nila napilde ang Meralco Bolts, 89-75, sa susama gihapon nga adlaw bago ang dula sa San Miguel ug Talk N' Text.

Nangulo si Romeo Travis sa Aces sa iyang 24 puntos ug 18 rebounds samtang nidugang si Jvee Casio og 11 puntos. Gikan sa higpit nga kombati, namugnaw ang Bolts sa kataposan nga kwarter.

Igo lang nituntong og labaw ang Bolts sa 71-70 apan nibinat og 9-2 run ang Aces gikan sa 6:73 minutos nahibilin sa dula nga wala na naapsan.

Niiskor ang Alaska og 22 puntos sa kataposan kwarter samtang ang Bolts 11 puntos lang.