ANG negosyanteng si William Guillani giakusahang nanglugos sa 16-anyos nga dalagita sa puloy-anan niini sa Barangay Patag ning siyudad sa Cagayan de Oro niadtong Martes.

Mipasaka og reklamong pagpanglugos si Rose (tinuod nga ngalan gipugngan), 16 anyos, residente sa Baungon, Bukidnon kuyog ang abugado niining si Atty. Jonathan Pacuribot.

Sa iyang sumbong, gibutyag ni Rose nga napulo ka adlaw na siya nagtrabaho sa tindahan nga gipanag-iya ni Guillani nga nahimutang sa Barangay Carmen.

Nahitabo ang pagpanglugos dihang gikuyog ni Guillani ang biktima didto sa puloy-anan niini aron unta manglimpyo, apan pagsulod sa lawak giingong gigakos siya deretso ug gihinol ang iyang pribadong parte sa lawas nga misangpot ngadto sa pagpanglugos.

Sa bahin ni Guillani, gibutyag niini sa Sun.Star SuperBalita walay kamatuoran ang maong sumbong sanglit sa iyang edad nga 65 anyos nakasinati na siya og pagkahalap sa mata.

Apan sigon niya nga iyang atubangon ang kaso nga gipasaka kaniya.

Gibutyag ni Guillani nga posibleng gigamit lamang kini nga pagpangdaot kaniya, hilabi na nga bukal siya iyang plano nga magpapili pagka-konsehal sa siyudad sa umaabot piniliay sa 2016.

Ang biktimang si Rose anaa na sa kustodiya sa Department of Social Welfare and Development (DSWD).