GIKLARO ni Lagonglong Mayor Manuel Pamisa Jr. nga wala niya gitalikdan ug gipasagdan ang mga lumad nga namakwit gikan sa ilang puloy-anan sa Sitio Camansi, Barangay Banglay, lungsod sa Lagonglong, Misamis Oriental.

Gipasabot ni Pamisa nga nakurat na lamang siya nga mideretso ang iyang mga residente sa Capitol Ground ning siyudad sa Cagayan de Oro human adunay reklamo kabahin sa presensya sa mga sundalo gikan sa 58th Infantry Battalion sa 4th Infantry Division-Philippine Army nga anaa sa maong sityo.

Unang gisaway si Pamisa sa giingong pagpasagad niini sa iyang mga sakop tungod kay ang mokabat 52 ka pamilyang lumad mideretso diha atubangan sa Capitol Ground.

Matud ni Pamisa nga wala miduol kaniya ang mga lumad nga andam unta siya modawat kanila, gani daw lu-ag kaayo ang ilang gymnasium sa lungsod nga temporaryong nahimutangan kanila.

Gipasabot niini nga dili niya kaalyado ang barangay kapitan sa Banglay ug daw maoy hinungdan wala miduol kaniya.

Daw nasayod siya nga anaa karon ang mga lumad sa maayong kamot apan giklaro ni Pamisa nga bukas kaayo ang iyang kamot sa pagdawat sa iyang mga residente hangtod nga masulbad ang problema tali sa mga lumad ug mga sundalo.

Kahinumduman ang kagamhanang local sa Misamis Oriental sa pagpangulo ni Governor Yevgeny Emano maoy nitabang ug nihatag sa ilang adlaw-adlaw nga panginahanglanon sa mga lumad nga mibakwit.

Sa pagsulat ning balita, ang mga lumad hugot nga miingon nga dili sila mobalik sa ilang sityo kung magpabilin pa ang mga sundalo sa dapit kinsa ilang giakusahan nga mihasi kanila. (SVB)