SAMAD sa dughan ang naangkon sa asawa human giluba sa iyang bana samtang kini natulog sulod sa ilang balay sa Zone 1, Revels Compound, Bayabas ning siyudad sa Cagayan de Oro.

Kritikal nga nilanding sa balay tambalanan sa Northern Mindanao Medical Center (NMMC) ning siyudad si Alicia Lamuste, 45, ug nagpuyo sa nahisgutang dapit.

Subay sa report sa NMMC, nasayran nga gikan sa trabaho ang biktima sa Cogon ug sa dihang nagpahulay ug natulog kay gikapoy nakurat na lamang kini nga niabot ang bana nga si Calixto nga grabe ka hubog ug deretso nga giluba ang asawa

Gikabutyag nga naghubog-hubog ang bana tungod kay nagselos sa iyang asawa.

Nakaangkon og samad sa dughan ang biktima hinungdan nga anaa kini sa talandugon nga kahimtang.

Sa pagsulat niini nga balita, ang maong biktima ang nagpabilin pa nga nagpaalim sa NMMC samtang gikabutyag nga ang suspetsado ang gikustodiya sa tinugyanan sa kapolisan human sa maong insidente.