GIBALHOG sa prisohan ang usa ka komentarista human gisikop sa mga tinugyanan sa Criminal Investigation and Detection Group sa Bukidnon niadtong Martes sa hapon tungod sa kasong libel.
Giila ang komentarista nga si Rey Cabaraban, 47, lumad nga taga siyudad sa Cagayan de Oro ug kasamtangan nga nagtrabaho isip komentarista sa Radyo Juan sa siyudad sa Valencia, Bukidnon.
Pinaagi sa giisyu nga warrant of arrest sa kasong two counts of libel pabor kang Bukidnon Governor Maria Jose Zubiri, gisikop si Cabaraban sulod mismo sa sibyaan sa Radyo Juan.
Aduna kini girekomendar nga P48 mil nga piyansa.
Gibutyag ni Cabaraban sa usa ka interbyu nga miuban siya og sakto sa mga polis nga misikop kaniya tungod kay wala man siya plano nga talikdan ang kaso.
Hinuon giingong' nakurat siya sa pag-isyu sa arrest warrant batok kaniya sanglit taod-taod na ang maong kaso.
Gibutyag niini nga gipasaka ang kaso samtang anaa pa siya nagkomentarista sa Happy FM sa siyudad sa Malaybalay diin giingong didto siya gisulong ni Bukidnon Governor Ma. Jose Zubiri.
Gipasabot ni Cabaraban nga gipasakaan siya og kaso ni Zubiri tungod sa iyang pagbatbat sa iyang programa kalabot sa iligal nga pagpamutol sa kahoy, pagmina, ug ingon man ang kahusay ug kalinaw sa maong probinsya.
Human sa Happy FM mibalhin si Cabaraban sa usa ka sibyaan sa Don Carlos Bukidnon apan giingong' giinitan na usab siya sa mga opisyal ug bag-ohay lang gidawat isip bag-ong komentarista sa Radyo Juan.
Gibutyag ni Cabaraban nga kung makagawas man siya sa prisuhan buhaton gihapon niya iyang trabaho isip komentarista tungod kay kini man ang iyang gibarugan ug sawayon ang mga hiwing binuhatan.
Sa iyang bahin ni Rene Centillas, kasamtangan nga board member sa Bukdinon ug station manager sa Radyo Juan miingon nga ilang ipasalig nga tabangan si Cabaraban nga makagawas si prisuhan apan hisgotan pa usab nila sa iyang mga kauban sa sibyaan kung makabalik ba kini sa iyang programa o basin mausab ang oras niini.
Aron usab malikom ang maong kantidad nga piyansa mitabang ang mga sakop sa prensa sa siyudad sa Cagayan de Oro partikular ang hugpong sa Cagayan de Oro Press Club ubos sa presidente niining si Jerry Orcullo nga matabangan kining makagawas sa prisuhan.
Si Governor Zubiri ang wala pay pahayag kalabot sa pagkasikop niini.