Fred Fuentes Monternel
Lorega Proper, Cebu City
NAGPANGLINGI si Rael sa iyang luyo nga nagtapion ang usa ka kamot sa samad sa iyang kilid. Nalantawan niya ang mga pulis nga migukod kaniya. Nasayod siya nga nagsingabot na ang iyang katapusan – ang iyang pagka notadong tulisan sa siyudad ug dugay nang gipangita sa mga tinugyanan sa balaod. Apan kinahanglan nga makaabot siya sa dapit nga iyang adtuan.
Didto mosangko si Rael sa simbahan sa parokya diin nahisakop ang balangay nga iyang gipuy-an. Sanglit daghang tawo ang nagpunsisok atubangan sa dakong wanang sa simbahan kay mosaksi sa gipahigayong Siete Palabras niadtong udtoha sa Biyernes Santo, wala mamatikdi ang hilom nga pag-uliot ni Rael nga milahos pagsulod sa pultahan sa luyong bahin sa simbahan. Nagtapion gihapon siya sa samad sa iyang kilid nga naigo sa bala sa kalibre .45 sa mga pulis nga migukod kaniya. Nagkaluya na siya. Nagkahanap ang iyang panan-aw. Nagkabugto-bugto na ang iyang pagginhawa. Unya natumba si Rael sa tiilan sa dakong krus sa sulod sa simbahan. Miahat siya paghangad nga nagping-it. Naklaro sa nagsukdip-sukdip niyang panan-aw ang imahen ni Hesukristo nga nagdupa nga gilansang sa dakong krus.
Nagdako si Rael sa siyudad nga way nailhang ginikanan. Nabuhi siya sa pagpanguot ug pang-esnats, hangtod nahimo siyang notadong tulisan dihang nakapalit siyag paltik nga ,357 rebolber nga maoy gigamit niya pagpanulis. Nag-solo siya sa iyang pagpanulis ginamit ang kinarnap niyang motorsiklo. Nakatulis na siyag mga ‘lending firm’ ug mga Turkong tigpatanto. Nakapatay na siyag duha ka negusynate og bugas. Tulisan man tuod siya apan duna siyay gibuhing batang lalake nga sayis anyos nga iyang gi-adap ug gipa-amumahan sa iyang iyaan nga si Nang Tonya nga maoy nagpuyo sa napalit niyang balay sa lugar sa mga eskuwater. Gihatag niya sa iyang iyaan ang kapin sa P200,000 human niya patya ang katapusan niyang biktima nga usa ka ‘livestock dealer.’
“Nang Tonya, ikaw na ang bahala kang Dong Tonton. Ibilin ko nimo kining kuwarta aron imong maggasto sa adlaw-adlawng panginahanglan ug sa pagtungha ni Dong Tonton, nga wa ikahatag kanako sa akong ginikanan,” tugon ni Rael. Dali siyang mibiya sa iyang balay kay gisundan man siya sa mga pulis.
Milanog dayon ang sipang mga buto-buto sa mga pusil gikan sa mga pulis. Mingislo si Rael dihang nabatyagan niya nga naigo ang iyang kilid.
Sa danag niyang kahimatngon nabati ni Rael ang tingog sa mga pulis nga nakasulod na sa luyong bahin sa simbahan. “Tua ra ang tulisan! Naghapa nga naglunang sa iyang dugo!
Mikulismaot ang nawong ni Rael sa tumang kasakit sa iyang gibati. Mipugos siya paghangad gikan sa tiilan sa dakong krus ug milibkas sa nagkabugto-bugto niyang mga pulong, “D-Diyos ko,,, sa i-imong m-mga k-kamot … I-itugyan k-ko ang a-kong k-kalag…!”
Ug unya mihagtos ang katapusang gininhawa ni Rael nga naghapang nagkaob sa tiilan sa dakong krus sulod sa simbahan. (Katapusan)