GAWAS sa unang 10 ka mga balay nga nasuta sa Cebu City Disaster Risk Reduction Management Office (CDRRMO), aduna’y laing 40 ka mga panimalay ang nasuta sa Mines and Geosciences Bureau (MGB) Central Office nga anaa sa risgo nga dapit sa Barangay Sirao, Cebu City.
Kini subay sa pahimangno na sa maong ahensiya ngadto sa kagamhanan sa dakbayan sa Sugbo nga i-relocate ang mga panimalay sa dapit tungod kay aktibo sa pagdahili sa yuta ang dapit.
Ang pagdahili nga nasinati sa mga sitio sa Langub ug Tawagan tungod kini sa nangagi nga pag-irog sa yuta sa Sirao ug sa paghumok sa yuta sa panahon sa ting-uwan.
Atol sa assessment nga gihimo sa grupo sa geologists sa MGB niadtong niaging buwan nga gipangulohan ni Liza Socorro J. Manzano, nasayran nga ang pagliki sa yuta sa dapit nagkalapad kini ug paingon ngadto sa sitio Tawagan ug sa Sirao Flower Garden.
Gawas sa mga liki, nasuta usab nila nga aduna’y mga sinkhole ug langub sa mga dapit.
Nakatala ang grupo og 22 ka sinkhole sa Mt. Kan-irag, Mt. Pung-ol ug Mt. Balisong nga aduna’y gilapdon nga 0.5 metros ngadto sa tulo ka metros ug gilapdon nga 0.5 metros ngadto sa 250 metros.