Dear Noy Tikyo,
Tawga lang ko og Mercy. Akong problema bahin sa akong bana.
Nagtrabaho ang akong bana isip family driver sa pamilyang Insik dinhi sa dakbayan. Pagtuo nako nga buotan siya ug way mga barkada busa misalig ko niya.
Mao nga nagmata lang ko og buntag sa dihang akong nasayran nga nauyab niya ang katabang sa iyang amo nga Insik.
Sa dihang akong gihupo-hupuan, ako gyud nga nasakpan mismo nga nag-uban ang duruha sa usa ka lugar ning siyudad.
Naghilom lang ko og pila ka semana, sa dihang wala ko na maagwanta ako dayon siyang gikomprontase. Miangkon siya sa iyang sayop ug nangayo og pasaylo ug misaad nga di na niya usbon. Maglikay na kuno siya sa babaye nga maoy namugos niya nga manuroy sila.
Milabay ang usa ka semana, iya kong giistorya ug giingnan nga mohawa na siya sa iyang trabaho aron nga makalikay sa babaye.
Karon naglibog ko kon mouyon ba ko sa iyang plano kay sa iyang suweldo ra mi nagsalig. Kon mawad-an siya og trabaho, asa na unya mi mangita sa among gastuhon?
Unsa kahay angay namong buhaton?
MERCY
*****
Mercy,
Mas nindot nga pabilin una siya og pipila ka semana sa maong trabaho, samtang wala pa siyay kabalhinan. Lisud man sab og ura-urada dayon ang iyang paghawa nga wala pa siya makaandam.
Bisan tuod og maayo ang iyang plano apan angay niyang ikonsidera ang inyong kahimtang. Unsa may iyang ipakaon ninyo kon mobiya dayon siya sa trabaho.
Naa ra man gyud na niya kon magpadala siya nianang bayhana. Bisan pa og mohawa siya diha unya kanunay gihapon ang ilang komunikasyon nianang bayhana, aw, wala gihapoy pulos ang paghawa sa iyang trabaho.
Apan og bisan naa siya diha unya barugan gyud niya nga di siya magpadala sa babaye, makalikay gyud siya bisan og unsaon siya og dani niini.
Mao nga for the meantime nga wala pa siyay kabalhinan, trabaho lang una siya apan likayan gyud ang babaye. Hugtan ang iyang pag-ampo kay way kumo kon mosalig ta sa Ginoo.
Tabangi sab siya og ampo ug kanunay ang pagpahimangno kaniya mintras nga wala pa siya makabalhin sa iyang trabaho.
NOY TIKYO