HANGTUD karon wa pa gayud klaro kon modagan o di si Mayor Rodrigo Duterte sa bisan unsang national position sa taliabot nga 2016 presidentila elections.
Daghan ang nag-awhag kaniya nga modagan sa pagka-presidente apan kutob ra moingon si Mayor Rody nga wala siyay plano niini.
Ang pamahayag sa mayor gikatingala sab sa uban tungod kay bisan og kanunay siyang mobalibad, apan kanunay man siyang nagsuroy-suroy sa nagkadaiyang dapit sa Pilipinas aron nga ikampanya ang Pederaslismo nga pangagamhanan.
Gawas niini, wa pod itago sa mayor nga duna nay nagahanyag kaniya og pinansiyal nga tabang aron nga magamit sa iyang kampanya.
Gani, kanunay nang makita sa telebisyon ug madungog sa radyo ang iyang infomercials bahin sa kalamboan ug kalinaw sa dakbayan sa Davao.
Labaw nang gikahibulong sa katawhan ang pagbutyag ni Mayor Rody ngadto kang kanhi North Cotabato governor Manny Pinol sa plano niyang i-tandem si Pampanga Governor Vilma Santos kon siya modagan sa pagka-presidente.
Gibutyag sab sa mayor ang bahin sa iyang mamahimong kaabag nga mga gabinete kon ugaling molansar siya sa 2016 kon diin giplanohan na niya nga ang mamahimong Defense secretary si Gibo Teodoro, Leni Robredo sa Department of Social Welfare Development (DSWD), Department of Finance - kanhi Agriculture sec.Carlos Doinguez III, Department of Interior and Local Government - kanhi DILG sec. Rafael Alunan III, ug Department of Justice - Vitaliano Aguirre.
Malagmit kaha nga modagan gyud si Mayor Rody sa 2016?
Magpaabot kita sa hukom sa mayor sa Oktubre kon diin mahibaw-an na ang tanan base unya sa iduso nga certificate of candidacy ngadto sa Commission on Election.
Kay segurado kita nga daghan pa gyud ang mamahimong kabag-ohan sa hukom sa mayor gikan karon hangtud sa maong bulan.