DUHA ka mga bata, kinsa apil sa nabuthan sa tangke sa gas didto sa Petronas Gas shop sa McArthur Highway sa Km. 7 Bangkal ning siyudad niadtong Martes sa gabii, namatay pipila ka oras ang milabay human sa pagbusikad.
Kini maoy gikompirma ni Bureau of Fire Protection (BFP) Davao Fire and Arson Investigator Ramil Gillado kagahapon.
Sumala ni Senior Fire Officer 2 (SFO2) Gillado nga ang mga menor nga sila si Kaisha, 5, ug Christy, 9, namatay tungod sa grabeng pagkapaso ug pagkasimhot sa init.
Ang duha ka bata pulos gideklara nga patay na alas 3 sa hapon sa nag-atiman nga doktor.
Sayo niini, gitaho nga dunay 13 ka mga tawo ang nangaangol, apan si Gillado nagsulti nga napun-an pa kini ngadto sa 16 kon diin gidali sa medical emergency team pagdala ngadto sa Southern Philippines Medical Center (SPMC) aron nga matambalan. Apan ang duha wala na makalahutay pa ug namatay.
Ang inahan sa duha ka mga bata nga namatay, nakahiagom sab og 3rd degree burn ug namatay sab ang 7-bulan nga anak sulod sa iyang tagoangkan nga nakuha na gikan kaniya.
Sa 16 nga naangol, 10 niini nakaangkon og 3rd degree burn sa nagkadaiyang mga bahin sa lawas, samtang ang lain pang unom nga biktima naangkon og 1st ug 2nd degree burn.
Mga biktima nagpaalim pa sulod sa ospital.
Sukad kagahapon, gisulti ni SFO2 Gillado nga padayon pa silang mihimo og imbestigasyon aron nga madeterminar ang hinungdan sa pagbusikad sa tangke sa gas.
Sayo niini, gikanayon niini nga gibanabana nga miabot og P1 milyon ang nahimong danyos sa hitabo.