HULIPAN na si Kapitan Mark Ferdinand Bas sa Barangay Lagtang, Talisay sugod ugmang adlawa.
Si Bas nasikop sa kapulisan human nakuhaan og armas ug mga bala ingon man granada kinsa gipasakahan nag kaso.
Si Talisay Department of Interior and Local Government Officer Celerino Magto Jr. miingon nga base sa balaod ang unang konsehal molingkod isip officer-in-charge (OIC) sa barangay.
Una niini si Konsehal Raul Cabañero kinsa maoy presidente sa Association of Barangay Council miingon nga mas maayo nga adunay molingkod nga OIC aron di mabakante ang pwesto ug magpadayon ang gimbuhaton sa barangay.
Human nga si Bas anaa pa sa prisohan tungod kay di malikayan nga adunay mga moadto sa barangay nga kinahanglan og desisyon gikan sa kapitan.
Si Magto miingon nga base sa balaod human sa upat ka adlaw nga mawagtang ang kapitan kinahanglan nga ang konsehal nga numero uno molingkod isip OIC.
Hinuon iyang giklaro nga kon makabutang og piyansa si Bas ug makagawas na kini mahimong makabalik siya sa pwesto.
Apan sa higayon usab nga makonbikto si Bas sa iyang kaso nga giatubang karon mahimong mahulipan siya sa hingpit isip kapitan.
Matod ni Magto nga ang trabaho ra isip kapitan nga himuon sa mohulip nga OIC apan sa honorarium ang iyang madawat isip konsehal mao ra kini samtang si Bas wa na usay madawat nga honorarium.
Ang molingkod isip OIC mao si Konsehal Chester Salcedo isip numero unong konsehal sa barangay Lagtang.
Nasayran si Bas gipasakahan nag kaso nga mao ang paghupot og armas mga bala ug granada.
Si Bas nagdumili na sa paghatag og dugang komentaryo sa iyang kaso nga giatubang apan miingon nga di iya ang mga nakuhang ebedensiya ug iyang gihulagway nga aduna kini bulok politika.
Sa pagkakaron, si Bas kasamtangang gitanggong sa Talisay Detention Cell.