Nalzaro: Hulga sa propesyon

BOLUNTARYO akong mi­ha­tan sa korte kagahapon human pirmahi ni Regional Trial Court (RTC) branch 5 presiding jugde Ricky Jones Macabaya ang akong warrant of arrest niadtong miaging adlaw sa kasong libel. Mibutang ako og piyansa nga P10,000 alang sa akong temporaryo nga kagawasan.

Human ako nakapiyansa ug pag-process sa gikinahanglang mga dokumento, gibuhian ra usab ako dayon sa huwes. Si Sr. Inspector Delfin Bontuyan sa CIDG 7 mao ang mi-serve sa warrant of arrest didto sa GMA 7 broadcast complex sa Nivel Hills, Lahug human sa akong programa kagahapon sa buntag.

Nalutsan ko og warrant human mapasaka ngadto sa korte ang kaso human gisalindot ni designated Prosecutor Jesus Rodrigo Tagaan ang akong motion for reconsideration sa iyang unang resolusyon nga pasakaan gyud ako og kaso gumikan sa akong gisuwat sa akong lindog sa Sun.Star Cebu niadtong Oktubre sa miaging tuig. Usa ka kanhi pulitiko ang mipasaka og kaso batok nako.

Hulga sa propesyon

Dili na lang ko motuki sa merito sa kaso gumikan kay anaa ra ba kini sa korte. Subjudice unya ta. Apan misang-at pa ako og petition for review sa Department of Justice dala ang paglaum nga ma-review ang maong kaso. Kining pag-atubang og kasong libel sa mga broadcaster ug journalists natural lang kini. Mao kini ang gi-ingon nga hulga sa propesyon. Okey, lang nga ikiha ta kay sa ipapatay ta. Wala gyud tay dag-anan kon ipapatay ta. Sa ubang mga lugar labi pa didto sa Luzon ug Minda­nao, walay kihaay didto. Ipapatay lang ang mga taga media. Unsa-on man nga mao kini ang atong gidangatan. Pero taas pa kining proseso ug dako ako og pagsalig sa atong judicial system sa nasud. Natayming pod nga ang pagdakop kanako bisperas sa Independence Day o adlaw sa kaugalingnan. Gawasnon gihapon ko.

Pasalamat

Salamat sa Sun.Star management nga maoy mi-abaga sa P10,000 nga piyansa. Ingon man sa akong mga suod nga higala nga mihatag sa ilang moral support samtang gidala ko didto sa korte kagahapon. Sila si Atty. Joan Baron ug Atty. Barbara Ocaba sa JP Garcia law office, akong mga kauban sa Sun.Star Cebu/Superbalita, Atty. Eddie Barrita, Atty. Eli Espinoza. Akong nga higala nga sila si Jay Ruiz, Patupat, Barili Captain Julie Flores, Fr. Mark Barneso, dySS Super Radyo news director Kit Matus, Lloyd Suarez ug Edgar Aniñon. Ug kay gawasnon naman ko, padayon gihapon ta sa atong pagpangalagad sa media. (bobby.nalzaro@yahoo.com)