MISAAD si Senate President Franklin Drilon sa pagtabang aron mabuhi pagbalik ang mga sapa sa dakbayan sa Sugbo, sama sa Guadalupe river.
Si Drilon dako og papel sa samang lakang sa Iloilo nga maoy nakalimpyo sa Iloilo river nga nilanat og upat ka mga tuig sa paglimpyo.
Gusto ni Drilon nga mokuha una og mga kasayuran ang Siyudad sa Sugbo sama sa orihinal nga gilapdon sa sapa, mga tawo nga maapektuhan ug pila ang mga estruktura.
Di yano nga tahas ang paglimpyo sa kasapaan nga sud sa daghang katuigan, giabusohan sa mga lumolupyo nga way pagpakabana sa epekto sa ilang gibuhat.
Daghan ang mga namuyo nga di mga kabus. Sama sa mga subdivision developers nga gitugtan nga makatukod og mga balay daplin sa kasapaan, kansang mga drainage system gisumpay sa sapa.
Pila usab ka mga balay patigayon, sama sa mga pabrika nga ang gihimong labayanan sa ilang mga hugaw mao ang mga sapa?
Bisan ang layo nga mga balay patigayon nisumpay sa ilang labayanan sa mga hugaw ngadto sa kasapaan.
Busa di dali nga buluhaton ang pag-rehabilitate sa kasapaan sa dakbayan sa Sugbo. Di kini mahimo sud lang sa pipila ka mga tuig.
Makapaabot ang kagamhanan nga dunay manukol nga mga balay patigayon ug land developers kon sugdan na ang pagpatuman sa rehabilitation project.
Kon dunay pulitikanhong kaisog sa pagduso sa proyekto ang kagamhanan bisan kinsa pa ang mobabag, madayon kini.
Gikinahanglan usab nga paapilon sa kampanya sa pagduso niini ang katawhan, gikan sa matag barangay, sityo ngadto na sa matag pamilya.
Mao ra ning paagiha nga molampos ang rehabilitation sa kasapaan nga gisuwayan na sa nangaging katuigan, apan pakyas.