USA ka Municipal Councilor ang namaligya og official receipts ug certificates of appearance sa Philippine Councilors League (PCL) 2nd Quarterly National Executive Officers - National Board Meeting ang nasikop sa kapulisan sa entrapment operation Huwebes, alas 9:00 sa buntag didto sa SMX Convention Center sa Lanang, Davao City.

Ang nasikop mao si Councilor Sergio Batistis, Jr. sa Albuera, Leyte nga dunay P103, 500 sa iyang mga kamot.

Ang taho nagsulti nga ang salapi gibayad ngadto kang Batistis sa pipila ka mga konsehal nga iyang nahaylo nga mobayad sa registration fee nga dunay diskwento.

Si PCL Executive Director Dr. Wilson Paclibar nagsulti nga ang dautang buhat ni Batistis gitaho na kanila sa miaging aktibidad sa PCL.

Ang entrapment operation sa Davao giplano pipila na ka adlaw ang milabay aron mahunong ang iyang modus operandi.

Si PCL National Chairperson Alma Moreno ug PCL National President Maybelyn Fernandez nagsulti nga ang entrapment operation kang Batistis naghatag og lig-on nga mensahe sa tanang PCL members sa tibuok nasud nga ang liderato sa PCL seryuso sa paglimpyo sa ilang han-ay ug protektahan ang imahe ug ipromotar ang good governance.

Nasayran nga si General Santos City Councilor Dominador Lagare III nagtakuban nga poseur buyer subay sa hangyo ni Dr. Paclibar ug PCL National Board Member Lawyer Oliver Owen Garcia modus operandi ni Batistis kagahapon sa buntag didto sa SMX Convention Center.

Sa video nga gipakita sa mga imbestigador sa Sta. Ana Police Station, nakita nga nakigsabot ang suspek sa duha ka mga tawo nga pulis ug konsehal.

Dihang gitunol na ang marked money, mibarog ang suspek dayon gikwenta ang salapi nga gibayad kaniya mao nga giagbayan dayon siya sa mga pulis.

Si Batistis, dihang gihinabi sa Sun.Star Davao Superbalita, miangkon nga nahimo niya ang krimen, apan nagdumili na siya paghatag sa detalye sa maong modus operandi

"Di nalang ko mohatag statement kay naa na man koy kaso," sulti ni Batistis, kinsa mihangyo ning tigsuwat nga tabangan siya nga kontakon ang iyang pamilya aron maatiman ang iyang kaso, mahatagan siya og abogado.

Siya miangkon nga di lang kini ang unang higayon nga mitambong siya sa aktibidad sa PCL.

"Nakatambong na ko unang tuig nga PCL conference," sulti niya, kinsa miangkon nga nahimo siya nga presidente sa Association of Barangay Captains (ABC) nga representante sa Sangguniang Bayan ug karon una niyang termino isip konsehal sa lungsod.

Si Batistis gikataho nga unang miabot dinhi sa siyudad sa Davao aron makapa-imprinta og PCL certificate, rubber stamp ug

uban pang peke nga dokumento.

"Sa harap ng UM Bolton niya pinagawa ang fake documents," sulti ni Police Supt. Royina Garma, hepe sa presinto uno, sa pakighinabi kaniya sa SuperBalita.

Nasayran ning tigsuwat nga daghang delegado ang naghangyo sa suspek nga

hatagan sila og certificate of apperance aron di sila motambong sa meeting, libre silang makasuroy sa lugar diin gihimo ang aktibidad.

Dugang nasayran nga mobayad lang ang kustomer nga konsehal og P1,500 pataas, depende sa sabot sa suspek.

Dihang gitawagan ang suspek sa nagtakuban nga pulis, giingon sa suspek nga didto lang nila himuon sud sa SMX Convention Center ang transaksyon.

"In fact, gusto nga niya (Batistis) na sa loob ang transaction kasi marami daw spy si Duterte, kaya doon namin siya kinausap sa loob," sulti ni Garma.

Ang suspek gipriso karon sa Sta. Ana Police Station samtang gihikay ang kasong swindling nga ipasaka batok kaniya sa korte.(AD)