ADUNAY posibilidad nga mahitabo og balik ang mass hysteria sud sa Cebu Provincial Detention and Rehabilitation Center kon di matabangan ang usa ka babayeng bilanggo nga makasugakod sa mga problema niini.
Si Rose Gonato, psychologist sa Pink Room sa Vicente Sotto Memorial Medical Center, nagkanayon nga mas maayo mahiling og usa ka professional nga espesiyalista sa panghunahuna si Geraldine Demecillo.
“Naay possibility mobalik ang (mass hysteria) kon di nato siya matabangan sa iyang coping ba,” siya niingon human niya mahinabi si Demecillo kagahapon sud sa usa ka oras sa CPDRC.
Si Demecillo, ang babayeng priso nga gikatahong unang nasudlan og espiritu human giingong wa mauli sa langub ang coconut crab o takos nga gikuha sa iyang bana sa lungsod sa Sogod.
Si Romeo Manansala, acting warden sa CPDRC, niingon nga kuti ang proseso sa pagpagawas og inmate gikan sa prisohan aron ipahiling og psychiatrist sanglit magkinahanglan sila og court order ug referral gikan sa doctor sa paghimo niini.
“Madali lang kon ang inmate between life and death na unya kinahanglan na gyud siya dad-on sa hospital,” pasabot niya.