DUHA ka mga Sugboanon nga gikatahapang mga sakop sa dakong sindikato sa ginadiling drugas nakuhaan og 45 ka kilo sa methamphetamine hydrochloride kun shabu nga balor og P225 million kagahapon sa usa ka police operation sa dakbayan sa Quezon.
Si Quezon City Police Director (QCPD) director Chief Superintendent Joel Pagdilao niingon nga sila si Garry Go ug Sheralyn Borromeo nadakpan human sila nibaligya og P5 milyunes nga shabu nga balor og lima ka kilo ngadto sa usa ka poseur buyer sa West Avenue, dakbayan sa Quezon.
Sila si Borromeo, 25, taga dakbayan sa Lapu-Lapu ug si Go, 54, minyo, negusyante, lumad nga taga dakbayan sa Sugbo, apan kasamtangang nagpuyo sa Angeles City, gitanggong sa QCPD headquaters sa Camp Karingal.
Ang laing 40 ka kilo nga shabu nakuha sa mga pulis gikan sa sakyanan sa duha.
Si Sr. Supt. Armando Radoc, in-charge sa Lapu-Lapu City Police Office, nisulti sa sibyaanang dyLA nga wa siya masayod sa operasyon sa Quezon City.
Si Borromeo wa sa ilang watchlist sa mga drug personality sa dakbayan.
Nagtuo si Radoc nga ang operasyon sa duha wa moabot sa Lapu-Lapu City.
Kasong kalapasan sa Republic Act 9165 ipasaka batok sa duha ka mga suspek.
Samtang usa ka level 2 drug pusher nakuhaag shabu human sa buy bust operation kagahapon sa alas 3:30 sa hapon sa Sitio Sunflower, Barangay Tisa dakbayan sa Sugbo.
Si Policarpio “Gaspar” Montemor, 58, minyo, nakuhaag 32 ka gamayng putos sa shabu, nga mobalor og P100,000 ug halin nga P780.
Gipusasan sa pag-apil ang iyang anak nga si Eric, 26, ulitawo, ug mga kauban nga sila si Jerome Larita, 28, ulitawo, kinsa nakuhaag kalibre .45 nga pistola nga dunay daghang bala ug si Cris Cadelinia, 24, ulitawo.
Si Sr. Insp. Eunil Avergonzado, hepe sa City-Anti-Illegal Drugs Special Operation Task Group (CAIDSOT) sa Cebu City Police Office (CCPO) nga nahinabi sa Sun.Star Superbalita, nagkanayon nga joint operation nila tali sa mga barangay opisyal pinanguluhan ni Brgy. Kapitan Philip Zafra ang gipahigayon.
Matod niya nga usa ka buwan nilang gi-monitor si Montemor human sila gihatagan og impormasyon gikan mismo sa mga barangay opisyal ingon man mga residente.
Human sa pagpaniid, sila nipalit gilayon og usa ka paketing shabu ngadto kang Montemor. (Sunnex)